2024 թվականի հոկտեմբերին Երևանում կայանալիք հրաձգության մրցումների հանրապետական փուլում ՀՀ Գեղարքունիքի մարզը կներկայացնի Զոլաքար գյուղի N 1 միջնակարգ դպրոցի թիմը:
Ինչպես տեղեկացանք Գեղարքունիքի մարզպետի աշխատակազմից, Հայաստանի Հանրապետության մարզերի և Երևան քաղաքի հանրակրթական դպրոցների 7-12-րդ դասարանների աշակերտների « Սպարտակիադա» մարզական միջոցառման շրջանակում Գեղարքունիքի մարզի դպրոցականների միջև անցկացվել են «Դիպուկ հրաձիգ» խորագիրը կրող հրաձգության մրցումներ: Այն անցկացվել է երկու փուլով` համայնքային և մարզային:
Համայնքային փուլի մրցումներն անցկացվել են մարտի 15-ին, որի ընթացքում լավագույն արդյունք ցուցաբերած դպրոցական թիմերն ապրիլի 5-ին Գավառի Հ. Թումանյանի անվան N 3 հիմնական դպրոցի հրաձգարանում մասնակցել են մարզային փուլի մրցումներին:
Յուրաքանչյուր թիմի կազմում ընդգրկվել են 4 տղա և 4 աղջիկ: Մրցումներն անցկացվել են օդամղիչ հրացաններով` մինչև թիրախ 10 մետր հեռավորությունից:
Հրաձգության միջազգային ֆեդերացիայի կանոնակարգի համաձայն՝ յուրաքանչյուր հրաձիգ կատարել է 6 կրակոց, որից հաշվարկային է եղել 5 լավագույնը:
Ծավալվել է հետաքրքիր և համառ պայքար, որի արդյունքում թիմային հաշվարկով 362 միավորով առաջին հորիզոնականը զբաղեցրել է Զոլաքար գյուղի N 1 միջնակարգ դպրոցի թիմը։
Երկրորդ տեղը 333 միավորով գրավել է Մարտունու Մ. Մելիք-Շահումյանցի անվան N 1 հիմնական դպրոցի թիմը, իսկ երրորդ տեղում, 316 միավորով, Գավառի Գեորգի Մնացականյանի անվան N7 միջնակարգ դպրոցի թիմն էր:
Մրցումների արդյունքներն ամփոփելուց հետո հաղթող թիմերին ՀՀ Գեղարքունիքի մարզպետի անունից հանձնվել են հավաստագրեր։
