Պատմաբան Ռաֆիկ Թադևոսյանը, անդրադառնալով Կառավարության թիվ 1 շենքի հարևանությամբ կառուցվելիք թմբուկի` Երևանի ճարտարապետ Նարեկ Սարգսյանի նախագծին, լրագրողների հետը հանդիպմանն ասաց, որ եկել է անկեղծ խոսելու ժամանակը: Նրա խոսքով` կառավարությունը 10 միլիոն դոլարանոց պայմանագիր է կնքել ռուսական մի ընկերության հետ, ինչն էլ նշանակում է, որ այդ միլիոնները կբազմապատկվեն ու կմսխվեն, ինչպես եղավ Սբ Գրիգոր Լուսավորիչ եկեղեցու պարագայում:
Խոսելով Հանրաապետության հրապարակի ճարտարապետական լուծումների մասին` նա թեև նշեց, որ մեր հրապարակը թամանյանական չէ, սակայն շատ լավն է: «Ի սկզբանե այն պետք է լիներ ճառագայթաձև, սակայն հիմա այդպես չէ, ու հիմա սրանից հետքա՞յլ կատարենք»,- վրդոված ասաց նա` հռետորական հարց բարձրացնելով, թե ի՞նչ է, այլ տեղ չկա այդ գումարները ծախսելու համար:
Նրա խոսքով` անգամ Անի Թամանյանը` Թամանյանի թոռնուհին է դուրս եկել թմբուկի կառուցման դեմ, քանի որ թե՛ իր, թե՛ բոլորի համար արդեն պարզ է թմբուկի նախագծողի ձեռագիրը, որն արդեն երևում է Հյուսիսային պողոտայի` «այդ այլանդակության մեջ»: «Կենտրոնի մեջ կարծես մտել է մի փիղ, որը կործանում է ամեն ինչ»,- նշեց նա:
«Նարեկ Սարգսյանն ինչո՞ւ է մի բառ կրկնում` «մասնագիտական », «մասնագիտական», որովհետև վախենում է հասարակությունից: Հիմա էլ ձեռք է զարկել սրան: Նա երևի չի լսել քաղաքացիական հասարակության մասին»,- նկատեց պատմաբանը` ընդգծելով, որ հասարակությունը պետք է ընդունի այդ նախագծերը, ապա նոր դրանք կյանքի կոչվեն: Նա տեղեկացրեց նաև, որ հրավիրվելու են երկու ֆորումներ` ճարտարապետների ու մտավորականների, որոնք իրենց կարծիքը կհայտնեն այդ նախագծերի վերաբերյալ:
