Մոլդովայի հանրապետության նախագահ Մայա Սանդուի Փարիզ աշխատանքային այցի շրջանակներում Մոլդովան և Ֆրանսիան համաձայնագիր կստորագրեն պաշտպանության ոլորտում համագործակցության մասին։ Այդ մասին հայտնել է Մոլդովայի նախագահի մամուլի ծառայությունը։
«Մարտի 7-ից 8-ը Փարիզում կլինի Մոլդովայի Հանրապետության նախագահ Մայա Սանդուն: Աշխատանքային այցի ծրագիրը ներառում է Ելիսեյան պալատում հանդիպում Ֆրանսիայի նախագահ Էմանուել Մակրոնի հետ և համագործակցության համաձայնագրերի ստորագրում»,- ասվում է հաղորդագրության մեջ։
Նոր փաստաթուղթը փոխգործակցության հնարավորություններ է բացում այնպիսի ոլորտներում, ինչպիսիք են անձնակազմի վերապատրաստումը, մասնակցությունը միջազգային առաքելություններին, օդային տարածքի վերահսկումը, տեխնոլոգիաների փոխանակումը և այլն: Նախկինում Ֆրանսիան Մոլդովային մատակարարել էր Ground Master (GM) 200 մարտավարական ռադար՝ երկրի օդային տարածքը վերահսկելու համար, ինչպես նաև նվիրաբերել էր ռազմական տեխնիկայի խմբաքանակ:
