Լոռիի և Շիրակի մարզերի սահմանին գտնվող Հայաստանի ամենամեծ Թռչկանի ջրվեժի և շրջակայքի էկոհամակարգը վտանգված է: Այս մասին այսօր լրագրողների հետ հանդիպման ժամանակ խոսեցին «Պահպանենք Թռչկանի ջրվեժը» քաղաքացիական նախաձեռնության անդամներ, անկախ փորձագետ Արմեն Քեշիշյանը և բնապահպան փորձագետ Լևոն Գալստյանը`պահանջելով, որ ՊՈԱԿ-ը ևս մեկ զննություն կատարի և հաստատի, որ ջրվեժի էկոհամակարգը չի վնասվի:
«Շաքեի ջրվեժը մեզ`բնապահպաններիս համար այլևս ջրվեժ չի, այսօր Հայաստանի միակ ամենախոշոր ջրվեժը Փամբակ գետի Չիչխան վտակի վրա գտնվող Թռչկանի ջրվեժն է: Այս ջրվեժի տեսարանը, էկոհամակարգը, գեղեցկությունը տեսնողները հասկանում են, որ պետք է մեծ ուշադրությամբ հետևել այդ ջրվեժին: Երբ առաջին անգամ տեսանք այն, իմացանք, որ շինարարություն է կատարվում: Հնարավոր է, որ շինարարությունը ինչ-որ ձևով ազդի ջրվեժի հետագա գործունեության վրա»,- նշեց բնապահպանը`ընդգծելով, որ դրանից հետո նախաձեռնեցին «Պահպանենք Թռչկանի ջրվեժը» քաղաքացիական նախաձեռնությունը:
Նշենք, որ դեռ 2004 թվականից ծրագրված է վտակի վրա ՀԷԿ կառուցել, ինչի դեմ այժմ պայքարում են բնապահպանները` այդ գաղափարն անհասկանալի և վտանգավոր համարելով: Բնապահպանները պահանջում են ևս մեկ անգամ տեղանքի զննություն կատարել, քանի որ Թռչկանի ջրվեժը համարվում է բնության հուշարձան:
