Բանգլադեշում արդեն երկու շաբաթ է՝ զանգվածային ցույցեր են տեղի ունենում․ հագուստի արտադրության ոլորտի հազարավոր աշխատակիցներ պահանջում են ավելի բարձր աշխատավարձ։ Ցույցերի ժամանակ իրավապահների հետ բախումների հետևանքով 3 մարդ է զոհվել։ Այս մասին հաղորդում է CNN-ի հրապարակումը։
Նշվում է, որ տվյալ ոլորտում աշխատում է 4 միլիոն մարդ, որոնք ստանում են ամսական 95 ԱՄՆ դոլարին համարժեք աշխատավարձ։ Պետության համապատասխան խորհուրդը աշխատակիցներին առաջարկել է աշխատավարձի բարձրացում մինչև 113 դոլարի, սակայն արհմիությունները չեն համաձայնել և պահանջում են ամսական 208 դոլար աշխատավարձ։ Ոլորտի աշխատակիցները հագուստ են արտադրում այնպիսի հայտնի ապրանքանիշների համար, ինչպիսիք են H&M-ը, Zara-ն, Puma-ն, Gap-ը, Levi’s-ը և այլն։
Չինաստանից հետո աշխարհում երկրորդ ամենախոշոր հագուստ արտադրող երկրում ցույցերի պատճառով փակվել են բազմաթիվ արտադրամասեր։ Նոյեմբերի 9-ին իրավապահների հետ բախումները լուրջ բնույթ են կրել։ Ոստիկանների կողմից ռետինե փամփուշտների և արցունքաբեր գազի կիրառման հետևանքով տասնյակ մարդիկ հիվանդանոցում են։ Ցուցարարները նույնպես անկարգություններ են հրահրել։
Al Jazeera-ն հաղորդում է, որ Բանգլադեշի վարչապետ շեյխ Հասինան նոյեմբերի 10-ին հրաժարվել է բավարարել աշխատավարձը բարձրացնելու՝ աշխատողների պահանջները։ Նա հայտարարել է, որ ցուցարարները պետք է ընդունեն իրենց առաջարկվող աշխատավարձը կամ «վերադառնան իրենց գյուղեր»։ Արհմիությունները մտավախություն ունեն, որ վարչապետի այս խոսքերը կարող են անվտանգության ուժերին հրահրել ավելի դաժան բռնությունների դիմել։
