Front Page Magazine օնլայն պարբերականը իր վերջին համարի «Ցտեսություն Եգիպտոս, ողջույն Իրան» խորագրով վերլուծության մեջ, անդրադառնալով նոյեմբերին կայանալիք խորհրդարանական ընտրություններին, նշել է, որ Եգիպտոսի «Մուսուլման եղբայրներ» կուսակցությունը փորձում է Իրանի օրինակով երկրում հաստատել կրոնական բռնատիրություն:
Պարբերականի փոխանցմամբ՝ «Ազատություն և արդարություն» կուսակցության առաջնորդ Մուհամադ Սաադ Ալ Քաթանին Եգիպտոսի զբոսաշրջության պաշտոնյաներին հորդորել է սահմանափակել զոբոսաշրջիկների ազատությունները և այնպիսի պայմաններ առաջադրել, որ զբոսաշրջիկների հագուկապը իսլամական արժեքներին համապատասխան դառնա:
Կահիրեի ամերիկյան համալսարանի դասախոս Հանի Հանրին, իր մտահոգությունները հրապարակելով, հայտարարել է. «Նույնը եղավ Իրանում, երբ չափավորական երիտասարդները, երկրում փոփոխություններ ցանկանալով, փողոց դուրս եկան, բայց մոլլաները, այդ հեղափոխությունը գողանալով, կրոնական բռնատիրություն հաստատեցին: Նույն իրավիճակն այսօր Եգիպտոսում է, և ես խիստ մտահոգված եմ դրանով»։
