Եգիպտոսի իսլամիստական «Մուսուլման եղբայրներ» կազմակերպության ներկայացուցիչն այսօր հայտարարել է, որ շարիաթի սկզբունքների հիման վրա, սուննի իսլամի բարձրաստիճան հոգևորականները «ֆեթվա» (հոգևորականների որոշում) են արձակել այն մասին, որ, եթե Իսրայելի դեսպանը վերադառնա Եգիպտոս, ապա նրան անհրաժեշտ է սպանել: Այս մասին հայտնում է mignews.com-ը` հղում անելով «Մուսուլման եղբայրներ»-ի ներկայացուցչի խոսքերին, ով այս մասին հայտնել է Al-Jazeera-ին:
Մուսուլման հոգևորականների որոշումը, սակայն, չի տարածվում այլ երկրների վրա:
Ինչպես նշվում է «ֆեթվա»-յում, անհրաժեշտ է սպանել նաև Եգիպտոս որպես զբոսաշրջիկ այցելող բոլոր «սիոնիստներին»:
Մուսուլման հոգևորականները միաժամանակ նշել են, որ Եգիպտոսում ժամանակավորապես իշխող Ռազմական գերագույն խորհուրդը ցանկանում է հետ վերադարձնել Իսրայելի դեսպանին, քանի որ վախենում է ԱՄՆ-ի կողմից ֆինանսական օգնության դադարեցումից:
Հիշեցնենք, որ Կահիրեում Իսրայելի դեսպանատան վրա ամբոխի հարձակումից հետո այդ երկրի դեսպանն անվտանգության նկատառումներով վերադարձել էր Իսրայել:
