Սառը պատերազմի ավարտից հետո արևմտյան երկրները հավատում էին Ռուսաստանի հետ գործընկերային հարաբերություններին, բայց Ռուսաստանը չընտրեց այս ճանապարհը, Եվրախորհրդարանի արտաքին հարաբերությունների հանձնաժողովի նիստում իր ելույթի ժամանակ ասաց ՆԱՏՕ-ի գլխավոր քարտուղար Յանս Ստոլտենբերգը։
Ստոլտենբերգի խոսքով՝ Ռուսաստանը որոշել է վերահսկել իր հարեւաններին, փորձել է վերականգնել ազդեցության ոլորտները՝ ասելով, որ ՆԱՏՕ-ին անդամակցելու երկրների որոշումը սադրանք է։
«Սա սադրանք չէ, դա յուրաքանչյուր երկրի ժողովրդավարական, ինքնիշխան իրավունքն է ընտրել իր ուղին։ Այսպիսով՝ 2008-ին ունեցանք Վրաստան, 2014-ին՝ Ղրիմ, 2022-ին՝ լայնածավալ միջամտություն։ Ուստի մեզ այլ տարբերակ չի մնում, քան ապահովել ՆԱՏՕ-ի դաշնակիցների խաղաղությունը՝ ներդրումներ կատարելով պաշտպանության մեջ և աջակցելով Ուկրաինային, քանի որ եթե նախագահ Պուտինը հաղթի Ուկրաինայում, դա ողբերգություն է ուկրաինացիների համար, և դա վտանգ է մեզ համար։
Սա մեսիջ է ավտորիտար առաջնորդներին, որ ցանկալի նպատակին կարելի է հասնել ռազմական ուժի կիրառմամբ։ Այնպես որ, մեր անվտանգության շահերից է բխում Ուկրաինային աջակցելը, և ես շնորհակալ եմ այն աջակցության համար, որ Եվրամիության և ՆԱՏՕ-ի անդամները ցուցաբերում են Ուկրաինային»,- ասել է Յանս Ստոլտենբերգը։
