Արևելագիտության ինստիտուտի տնօրեն, թուրքագետ Ռուբեն Սաֆրաստյանն «Առաջին լրատվականի» հետ զրույցում, խոսելով Իսրայելի ԱԳ նախարար Լիբերմանի ծրագրի մասին, նշեց, որ Թուրքիայի և Իսրայելի միջև տեղի ունեցող իրադարձություններն արտահայտում են մի գործընթացի սկիզբ, որն աշխարհաքաղաքական նշանակություն ունի. «Այս պայմաններում Հայաստանն իր առջև նման խնդիրներ չի դնում և աշխարհաքաղաքական այս խաղի մեջ մտնելու որևէ ցանկություն չպիտի ունենա»:
Թուրք-իսրայելական հակամարտությունը քաղաքական տեսանկյունից դիտարկելով՝ Սաֆրաստյանը նկատեց. «Հստակ է, որ Իսրայելը այս իրավիճակում փորձելու է օգտագործել հայկական գործոնը Թուրքիայի վրա ճնշումներ գործադրելու համար: Կարելի է կանխատեսել, որ առաջիկայում հրեական լոբբին ավելի սերտորեն կսկսի համագործակցել հայկական լոբբի հետ՝ Ցեղասպանության ճանաչման գործում»:
Սաֆրաստյանը նշեց, որ Հայաստանի քաղաքական կարևոր նպատակներից է Ցեղասպանության ճանաչումը, և եթե Իսրայելը ցանկություն ունի ճանաչել Ցեղասպանությունը, ապա դա իր խնդիրն է. «Այնպես որ, Թուրքիային ճնշելու գործընթացում Հայաստանի մասնակցությունը քննարկելն իմաստ չունի, քանզի մենք մեր խնդիրներն ունենք և փորձում ենք լուծել մեր խնդիրները, իսկ Իսրայելն էլ փորձում է իր խնդիրների լուծման համար օգտագործել հայկական գործոնը»:
Հիշեցնենք, որ Իսրայելի ԱԳ նախարար Ավիգդոր Լիբերմանը հանձնարարել է միջազգային ասպարեզում Թուրքիային հակազդելու միջոցներ մշակել, դրանց թվում` հայերին և քրդերին սատարելու միջոցով:
