ԱՄՆ Ազգային հետախուզության ծառայություն
Ընդ որում, գործընկեր կարող են դառնալ ոչ միայն պետությունները, պետական կառույցները, այլև՝ ոչ պետական սուբյեկտները։
ԱՄՆ հետախուզական ծառայությունները մտադիր են զգալիորեն ընդլայնել այն երկրների, ընկերությունների, անգամ՝ ոչ պետական կառույցների ցանկը, որոնց հետ համագործակցում են՝ Միացյալ Նահանգներին ու նրա դաշնակիցներին սպառնացող վտանգների մասին տեղեկություններ ստանալու համար:
Փոփոխությունները՝ ԱՄՆ հետախուզության նոր ռազմավարության վերանայման մի մասն են, որոնց նպատակն է ամրապնդել Վաշինգտոնի դիմադրողականությունը տարբեր սպառնալիքներին ընդառաջ:
Այդ սպառնալիքներն այլևս չեն սահմանափակվում ավանդական մրցակից պետություններով, ինչպիսիք Չինաստանն ու Ռուսաստանն են, կամ ահաբեկչական կազմակերպություններով՝ «Ալ-Քաիդան» և «Իսլամական պետությունը»:
«Միացյալ Նահանգները բախվում է աստիճանաբար ավելի բարդ և փոխկապակցված սպառնալիքների»,- հայտարարել է ԱՄՆ Ազգային հետախուզության տնօրեն Ավրիլ Հեյնսը՝ թվելով մի շարք մարտահրավերներ՝ Չինաստանից ու Ռուսաստանից սկսած մինչև կլիմայի փոփոխությունն ու համաճարակները, ինչպիսին «Covid-19»-ն էր:
«Ներպետական և ոչ կառավարական դերակատարները՝ միջազգային կորպորացիաներից մինչև անդրազգային սոցիալական շարժումներ, ավելի մեծ հնարավորություններ են ձեռք բերում ազդեցություն ունենալու, մրցակցելու տեղեկության ստանալու համար, քաղաքականությանը և անվտանգությանը վերաբերող հարցերում որևէ արդյունքի հասնելու կամ անտեսելու այն։ Սա հնարավորություններ է ստեղծում նոր գործընկերության համար, բայց նաև նոր մարտահրավեր է ԱՄՆ շահերին»,- գրել է Հեյնսը 2023 թվականի ռազմավարությունում:
«Բացի այդ, ընդհանուր գլոբալ մարտահրավերները, ներառյալ՝ կլիմայի փոփոխությունը, մարդկանց առողջությանն ու անվտանգությանը սպառնացող վտանգները, նոր և «ճեղքում» գրանցող տեխնոլոգիաները միահյուսվում են, ինչը լուրջ հետևանքներ է ունենում, որոնք հաճախ շատ դժվար է կանխատեսել»,- նշել է Հեյնսը:
Այս փետրվարին հրապարակված սպառնալիքների վերաբերյալ տարեկան գնահատման մեջ ԱՄՆ հետախուզական համայնքը նախազգուշացրել է «ոչ պետական դերակատարների զարգացող բազմության», գլոբալ արտակարգ իրավիճակների, որոնցից է կլիմայի փոփոխությունը, և նոր տեխնոլոգիաների մասին, որոնք «ի վիճակի են փոխել գործարար ու սոցիլական ավանդական կարգը»:
Գնահատման մեջ նշված է, որ այդ փոփոխությունները կարող են ունենալ և՛ դրական, և՛ բացասական հետևանքներ՝ «միաժամանակ ստեղծելով աննախադեպ խոցելիություններ և հարձակման մակերեսներ»:
Նոր ռազմավարությունը նպատակ ունի հակազդել այս միտումներին՝ ամրապնդելով առկա գործընկերությունները հետախուզության ոլորտում, ներառյալ՝, այսպես կոչված, «Հինգ աչքերի» դաշինքը՝ ԱՄՆ, Միացյալ Թագավորության, Կանադայի, Ավստրալիայի ու Նոր Զելանդիայի միջև, և ստեծել նորերը:
Մասնավորապես, ռազմավարությունը նախատեսում է տեղեկատվության փոխանակում ԱՄՆ հետախուզական ծառայությունների և մասնավոր ընկերությունների՝ «ոչ պետական և ներպետական դերակատարների» միջև։
Սա ներառում է հարաբերություններ ոչ կառավարական կազմակերպությունների (ՀԿ-ների), վերլուծական կենտրոնների և այլ կազմակերպությունների հետ, որոնք կարող են օգնել ԱՄՆ հետախուզությանը՝ տեղերում իրենց փորձի կամ փորձագիտական կարողությունների միջոցով:
Ռազմավարությունը ուղեցույց է ԱՄՆ բոլոր՝ 18 հետախուզական գործակալությունների, այդ թվում՝ Ազգային հետախուզության տնօրենի գրասենյակի, Կենտրոնական հետախուզական վարչության, Ազգային անվտանգության գործակալության, Պաշտպանության նախարարության հետախուզական ծառայության և Հետաքննությունների դաշնային բյուրոյի համար:
