Մոսկվայի մարզի Սերգիև Պոսադ քաղաքում տեղի ունեցած պայթյունի վայրում ավարտվել են փլատակների հեռացման հիմնական աշխատանքները: Այս մասին հաղորդում է ТАСС գործակալությունը։
Պայթյունը տեղի էր ունեցել օգոստոսի 9-ին Զագորսկի օպտիկամեխանիկական գործարանի հարևանությամբ գտնվող հրատեխնիկական արտադրանքի պահեստում:
«Փլատակների հեռացումն ավարտվել է, տեղում աշխատանքները շարունակվում են», – գործակալությանը հայտնել են արտակարգ ծառայություններից։
Արտակարգ դեպքից հետո առաջին ժամերին հարազատներից 12 դիմում է եղել անհետ կորածների մասին: 4 մարդ, որոնք անհետ կորած էին համարվում, գտնվել են: Այսպիսով, ներկայում անհետ կորած է 8 մարդ:
Պայթյունից հետո բժշկի է դիմել, ընդհանուր առմամբ, 84 մարդ։ Մեկ մարդ մահացել է հիվանդանոցում։
Դեպքի փաստով հարուցվել է քրեական գործ՝ վտանգավոր արտադրական օբյեկտների արտադրական անվտանգության պահանջները խախտելու դեպքի առթիվ։ Պահեստի սեփականատեր հանդիսացող «Պիրո Ռոս» ընկերության տեխնիկական տնօրենը բերման է ենթարկվել:
