Եվրոպայի խորհրդի խորհրդարանական վեհաժողովի Մոնիթորինգի հանձնաժողովը երեկ հայտարարություն էր տարածել, որում նշվել է. «Հայաստանում հայտարարված վերջին համաներումը, 2008թ. մարտյան իրադարձությունների ընթացքում 10 մահվան դեպքերի նոր հետաքննություն սկսելու ազդակը, ընդդիմության ու կառավարող կոալիցիայի միջև կառուցողական երկխոսության արդյունավետ սկիզբը նշանակում են, որ 2008 թվականի մարտյան դեպքերի վերաբերյալ գործը կարելի է վերջնականապես համարել փակված» ։
Հայաստանի ժողովրդավարական հաստատությունների գործառույթի մասին բանաձևի նախագիծը քննարկվելու է ԵԽԽՎ աշնանային նստաշրջանի ընթացքում: Հայաստանի հարցով համազեկուցողներ Ջոն Պրեսկոտն ու Աքսել Ֆիշերը ներկայացրել են 18 էջանոց մի փաստաթուղթ, որով ողջունում են «իշխանությունների և քաղաքական բոլոր ուժերի կողմից ցուցաբերած քաղաքական կամքը` Եվրոպայի խորհրդի չափանիշների և հանձնարարականների հիման վրա խնդիրը լուծելու համար»:
Ըստ հանձնաժողովի՝ 2008 թ. իրադարձությունները և դրանց հետևանքները բացահայտեցին երկրի դեմոկրատական զարգացման առաջնահերթությունները. «Մասնավորապես` իրական ժողովրդավարական խորհրդարանական ընտրությունների անցկացումը, ստեղծումը հուսալի ժողովրդավարական և բազմակարծիք քաղաքական մթնոլորտի, որը կվայելի հայ հասարակության լիարժեք վստահությունը, բաց և բազմակարծիք լրատվական դաշտի ստեղծումը, ոստիկանության և դատական համակարգի ռեֆորմները` այդ մարմինների անկախությունը երաշխավորելու նպատակով, ինչպես թղթի վրա, այնպես էլ գործնականում:
«Առաջին լրատվական»-ի հետ զրույցում «Հանրապետություն» կուսակցության առաջնորդ Արամ Սարգսյանն, անդրադառնալով վերոնշյալ հայտարարությանը` նկատեց. «Աշխարհը իրականում այդքան էլ արդար չի, արդարությունն Աստծո մոտ է: Մեր ժողովուրդը ինքն է որոշողը` իր պատմության որ էջն է փակ և որ էջն է բաց: Որ այս երկրին փոփոխություններ են անհրաժեշտ` յուրաքանչյուր հայ հասկանում է: Որ ԵԽԽՎ Մոնիթորինգի հանձնաժողովի գործող անձինք կամ մոնիթորինգ իրականացնող անձինք դա չեն ընդունում, չեն հասկանում` սա արդեն իրենց պրոբլեմն է: Մեր ժողովրդի հավաքականությունն է, որ պիտի աշխարհին ցույց տա, որ Հայաստանում լուրջ խնդիրներ կան, և դա է պատճառը, որ Հայաստանը դատարկվում է»: