Շուտով կլինի երկու ամիս, որ «Ռոսսելխոզնադզորը» հայտարարել է Հայաստանից Ռուսաստան կաթնամթերքի ներմուծման հնարավոր սահմանափակումների մասին՝ հայկական կողմի թույլ վերահսկողության և սահմանափակող միջոցների խախտման պատճառով։ «Ռոսսելխոզնադզորի» հետ կապված դեպքը, ըստ տարբեր գնահատականների, նաև քաղաքական ընկալում է ունենում, որովհետև այդ ամբողջը կարող էր Հայաստան գալ ներքին խողովակներով, բայց եկավ արտաքին խողովակներով։
ՀՀ ՍԱՏՄ իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանը «Առաջին լրատվական»-ի հետ զրույցում նշեց, որ ռուսական կողմից այդ հայտարարության պատճառը եղել է այն, որ իրանական երկու կազմակերպությունից, որոնք ռուսական ռեեստրում գրանցված չեն, ներմուծվել է այդ հումքով պատրաստված կաթնամթերք:
«Մենք պատասխանել ենք, որ կոնկրետ կաթնամթերքի անվտանգության չափորոշիչների որևէ խնդիր չկա: Ռուսաստանը խնդիր է առաջացնում միայն կապված այդ հումքի հետ: Իսկ ինչու ենք մենք այդ հումքով պատրաստված կաթնամթերքը թույլ տվել մտնի ՌԴ, որը, բնականաբար, սահմանային վերահսկողություն էլ է անցել, որովհետև այդ երկու կազմակերպությունները ԵԱՏՄ ռեեստրում գրանցված եղել են: Բայց Ռուսաստանը պնդում է, որ եթե նույնիսկ ԵԱՏՄ ռեեստրում գրանցված է, բայց ՌԴ ռեեստրում չկա, ինքը թույլ չի տալիս: Խնդիրը սա էր»,-ասաց նա:
Անուշ Հարությունյանը մանրամասնեց, որ դրանից հետո ռուսական կողմը 5 օր ժամանակ է տվել, որ Հայաստանն այդ խնդիրը փորձի կարգավորել, բայց հետո ասել են՝ մենք փակում ենք, մինչև էդ խնդիրը ձեզ մոտ կարգավորվի. «Փակեցին, սկսվեցին բանակցություններ, որը տևեց մոտ 10-15 օր, մինչև ապրիլի 10-ը: Նաև ՍԱՏՄ ղեկավարը գնաց Մոսկվա, այնտեղ էլ կոնկրետ հանդիպման տեսքով բանակցությունները շարունակվեցին և եկան այն եզրակացության, որ մենք պետք է այնուամենայնիվ համապատասխանեցնենք ռուսական պահանջներին, որից հետո իրենք կդիտարկեն՝ թույլ տալ, թե ոչ:
Իսկ մեր ընթացակարգով մենք ստուգումներ կարող ենք իրականացնել կամ ստուգումների պլանի հիման վրա, որը հաստատվում է կառավարման խորհրդի կողմից, դա ընդգրկում է մոտ 1000 տնտեսվարողի, կամ բողոքների, առաջարկությունների հիման վրա, որոնք գալիս են պետական մարմիններից, հասարակությունից, ՀԿ-ներից և այլն»,-ընդգծեց նա:
Անուշ Հարությունյանը նկատեց, որ եթե նույնիսկ պայմանավորվածություն լինի, որ այդ ընկերություններն ամեն ինչ համապատասխանեցնում են պահանջներին, միևնույն է, ՍԱՏՄ-ն չի կարող մտնել, ստուգել, եթե իրենք չառաջարկեն. «Դրա համար մենք հաղորդագրություն տարածեցինք, որ խնդրում ենք, այն կազմակերպությունները, որոնք ուզում են վերականգնել արտահանումը ՌԴ, թող դիմեն, որ կարողանանք ստուգում իրականացնել:
Այդ հաղորդագրության հաջորդ օրվանից դիմումները սկսվեցին: Հենց առաջին 5 օրում արդեն 10 դիմում ունեինք: Այս պահին 12 դիմում ունենք և իրենց մոտ հիմա վերահսկողությունն ընթանում է: Մենք դրանց արդյունքները կներկայացնենք ռուսական կողմին և կհրապարակենք այդ 12 ընկերությունների ցանկը:
Այս պահին դեռ որևէ ընկերության ստուգման արդյունքը չունենք: Հենց թեկուզ մեկ ընկերության թույլ տար արտահանումը վերսկսել, մենք անպայման կհրապարակենք»,- իր խոսքն ամփոփեց Անուշ Հարությունյանը:
