«ԱրմենՏել» ՓԲԸ-ն (ապրանքանիշը` Beeline) հայտարարում է Beeline «Նոր մեդիա դպրոց»-ում ուսումնական երրորդ փուլի մեկնարկի մասին: Beeline «Նոր մեդիա դպրոց»-ի դասընթացները նախատեսված են այն մարդկանց համար, ովքեր ցանկանում են ծանոթանալ ինտերնետ հաղորդակցության հիմնական սկզբունքներին ու կանոններին և համացանցի տարբեր հարթակներում վարել ինտերնետ-օրագիր: Դասընթացներն անցկացվում են հայտնի փորձագետների, հանրահայտ բլոգերների և ինտերնետ հաղորդակցությունների մասնագետների կողմից: Դպրոց ընդունվելու հայտ կարող են ներկայացնել բոլոր ցանկացողները. լրագրողներ, գրողներ, հրապարակախոսներ` բոլոր նրանք, ովքեր ցանկանում են մտքեր փոխանակել իրենց էլեկտրոնային օրագրերի ընթերցողների հետ:
Ողջունելով երրոդ փուլի մասնակիցներին` «ԱրմենՏել» ՓԲԸ-ի գլխավոր տնօրեն Իգոր Կլիմկոն ասաց. «Beeline-Համալսարանի հարկի տակ դուք կծանոթանաք ինտերակտիվ մեդիա աշխարհին, կհանդիպեք հայտնի հայ բլոգերների հետ: Թող ստացած գիտելիքներն ու հմտություններն օգնեն ձեզ ստեղծել որակյալ և հետաքրքիր բովանդակություն, որը կներգրավի ընթերցողներ և կբարձրացնի Հայաստանում հայալեզու բովանդակության հանրային նշանակությունը»:
Beeline «Նոր մեդիա դպրոց» նախագիծն իրականացվում է «Ժառանգ» ՀԿ-ի հետ համատեղ` 2011 թ. հունիսից: Յուրաքանչյուր դասընթացի տևողությունը երեք շաբաթ է, շաբաթական երեք պարապմունք: Դասընթացն ավճար է և նախատեսված է 18-35 տարեկան անձանց համար: Ծրագրին մասնակցելու վերաբերյալ տեղեկություններ կարելի է ստանալ «Նոր մեդիա դպրոց»-ի կայքում (http://nmd.zharang.org), կամ Facebook սոցիալական ցանցում` http://www.facebook.com/normediadproc հասցեով:
