Թուրքական Ihlas լրատվական գործակալության փոխանցմամբ՝ Իրանի խորհրդարանի ազգային անվտանգության և արտաքին քաղաքականության հարցերով կոմիտեի նախագահ Իսմայիլ Կոսարին անդրադարձել է Թուրքիայի տարածքում ՆԱՏՕ-ի ռադիոտեղորոշիչ կայանի (ՌՏԿ) տեղակայման խնդրին.
«Եթե Թուրքիան իր տարածքում տեղակայի ՆԱՏՕ-ի ՌՏԿ-ն, ապա դա կարող է բացասաբար անդրադառնալ Թեհրանի և Անկարայի հարաբերությունների վրա, դա անցանկալի հետևանքներ կունենա Անկարայի համար։ Թուրքիան կարող է հույս չունենալ, թե Իրանը կօգնի նրան ահաբեկչական Քրդստանի աշխատավորական կուսակցության (PKK) դեմ պայքարում։
Իրանը պատմականորեն սերտ կապեր ունի եղբայրական և բարեկամական Թուրքիայի հետ, սակայն տվյալ դեպքում Թուրքիան մի կողմ է դրել իր ազգային շահերը և առաջնորդվում է ԵՄ-ի ու ԱՄՆ-ի քաղաքականությամբ։ Պետք է հաշվի առնել, որ Թուրքիայի նմանատիպ քայլը Մերձավոր Արևելքում ստեղծում է անվստահության մթնոլորտ։ Թուրքերը մուսուլմաններ են, նրանք ձգտում են սերտ հարաբերություններ հաստատել մուսուլմանական երկրների հետ։
Թուրքիայի կառավարության ընդունած որոշումը չի բխում թուրք ժողովրդի շահերից։ Ընդհակառակը, այն կարող է նվազեցնել իր կառավարության նկատմամբ թուրք ժողովրդի վստահությունը։ Մենք նմանատիպ քայլ չէինք ակնկալում եղբայրական Թուրքիայից։
Թուրքական նախկին կառավարություններն այդպիսի համաձայնագիր չէին կնքի ՆԱՏՕ-ի հետ։ Ինչպե՞ս կարելի է պատկերացնել, որ այդպիսի քայլի է գնացել իսլամիստական «Արդարություն և զարգացում» կուսակցությունը (ԱԶԿ)։ Այս ամենի պատճառով Իրանը կարող է վերանայել Թուրքիայի հետ իր հարաբերությունները։ Դա մասնավորապես վերաբերում է PKK-ի խնդրին։ Մենք լուծել ենք նրա (PKK-ի իրանական թևի՝ PJAK-ի) հարցը։ Սակայն Թուրքիայի համար այդ խնդիրը դեռ պահպանվում է, և թող նրանք այլևս հույսեր չունենան, թե մենք իրենց կօգնենք՝ ահաբեկիչների դեմ պայքարում։ Սա միայն մեր ձեռնարկելիք քայլերից մեկն է։
Թուրքիայում տեղակայվելիք ՌՏԿ-ն ուղղակիորեն սպառնում է Իրանին։ Եթե Թուրքիան դրա համար հատկացնում է իր տարածքը, ապա ինչո՞ւ դա պետք է տեղադրվի նրա հարավ-արևելյան հատվածում՝ Իրանի սահմանին։ Ինչո՞ւ այն չի տեղակայվում մեկ այլ տեղ, ասենք՝ Թուրքիայի արևմտյան կամ հյուսիս-արևմտյան հատվածում։ Եթե դա Իրանի դեմ ուղղված չէ, ապա ինչո՞ւ այն չի տեղակայվում Եվրոպայում։ Մենք անպայմանորեն դիտարկելու ենք այս հարցը»։
Իր ամփոփիչ ելույթում Կոսարին թուրք քաղաքական գործիչներին կոչ է արել մտածել սեփական ժողովրդի շահերի մասին՝ Արևմուտքի քաղաքականությամբ առաջնորդվելու փոխարեն։
Հիշեցնենք, որ Թուրքիայի տարածքում ՆԱՏՕ-ի հակահրթիռային պաշտպանության տարրերի տեղակայման մասին որոշումն ընդունվել է 2010 թվականի նոյեմբերին՝ Լիսաբոնում տեղի ունեցած ՆԱՏՕ-ի գագաթնաժողովի ժամանակ։
