«Չնայած համաշխարհային և տարածաշրջանային մարտահրավերներին՝ Հայաստանը հետևողականորեն շարունակում է իրականացնել ժողովրդավարական բարեփոխումների օրակարգը», -մարտի 29-ին Ժողովրդավարության Վեհաժողովի իր ելույթում հայտարարել է Հայաստանի վարչապետ Նիկոլ Փաշինյանը, խոսելով հայկական ժողովրդավարության հեռանկարի ոչ միայն ներքին, այլ նաեւ արտաքին սպառնալիքների մասին:
ԱՄՆ նախագահ Ջո Բայդենի նախաձեռնությամբ տեղի ունեցող Վեհաժողովին Հայաստանի վարչապետի ելույթը բավականին հակիրճ էր, միաժամանակ նաև շոշափում էր թե Հայաստանի, թե նաև միջազգային կյանքի համար առանցքային խնդիրներն ու ռիսկերը, սպառնալիքներն ու մարտահրավերները: Հայաստանն իր խնդիրները փորձեց առավելապես ներկայացնել միջազգային անվտանգության համակարգի համատեքստում, միաժամանակ արձանագրելով՝ որ Հայաստանի ժողովրդավարությունը ենթարկվում է ագրեսիայի սպառնալիքի և այստեղ հարցը շատ պարզ է՝ այդ սպառնալիքի առաջ Հայաստանը մենակ է, թե՞ ոչ:
Մնացյալը թերևս պետք է լինի Վեհաժողովին հաջորդելիք բարդ դիվանագիտական-քաղաքական աշխատանքի առարկա, որ նախ եւ առաջ պետք է ծավալել ժողովրդավարության պաշտպանության առանցքային դիրքերում կանգնած պատասխանատու խաղացողների հետ՝ Միացյալ Նահանգներ, Ֆրանսիա, եվրոպական այլ առաջատար երկրներ: Առանցքայինն այն է, որ Հայաստանը դրսևորել է բարդագույն ռեգիոնալ ռազմա-քաղաքական իրավիճակում, ժողովրդավարությանը սպառնացող ռիսկերի պարագայում Վեհաժողովին մասնակցություն ունենալու քաղաքական կամք, միաժամանակ դրել այդ կամքին համարժեք արձագանքի հարցը, որպես գործնական եւ առարկայական հարաբերության ու աշխատանքի անկյունաքար: Միաժամանակ, շատ կարեւոր է, որ Հայաստանի վարչապետի ելույթում չկա աշխարհհը ժողովրդավարների և ոչ ժողովրդավարների բաժանելու որեւէ միտում, որեւէ ուրվագիծ: Երեւանի համար սա էական է, քանի որ, Հայաստանը ստիպված է մանևրել բավականին բարդ ռազմա-քաղաքական ռեգիոնալ միջավայրում:
Վաշինգտոնի նախաձեռնությունը բաժանարար գծերի վերածելը Հայաստանի համար հղի է ավելի ռիսկերով, քան Հայաստանի ժողովրդավարությանը սպառնացող ռիսկերի չեզոքացման: Ըստ այդմ, Հայաստանը Վաշինգտոնի Վեհաժողովում սահմանեց ժողովրդավարական աշխարհի իր տեսանելի շրջանակն ու պատասխանատվությունը, որպես աշխատանքային «պաշտպանության» մեկնակետ:
