Այսօր լրագրողների հետ հանդիպման ժամանակ նորաստեղծ «Մշակույթ» համահայկական հիմնադրամի նախագահ, բանաստեղծ Ռազմիկ Դավոյանը, գործադիր տնօրեն Աբգար Ափինյանն ու խորհրդի անդամ, դերասան Երվանդ Մանարյանն անդրադարձան Հայաստանի մշակութային կյանքին ու խնդիրներին, ներկայացրեցին հիմնադրամի ստեղծման շարժառիթները:
Աբգար Ափինյանի խոսքերով` առկա բոլոր խնդիրնեը լուծելու համար պետք է ցուցաբերեն լուծման նոր բանալիներ, պետք է անդրադառնան հրատարակչական խնդիրներին ու մրցանակաբաշխություններին:
««Մշակույթ» հիմնադրամը հնարավորություն կտա գործել միասնաբար: Պետք է մշակույթով զբաղվեն մշակութային գործիչները»,- ասաց Ափինյանը` ընդգծելով, որ դռները պետք է բաց լինեն մշակույթի ներկայացուցիչների առաջ։
Նա տեղեկացրեց հիմնադրամի մեկամսյա գործունեության մասին, որին օժանդակել են մշակույթի նախարարը, Վանաձորի քաղաքապետը: Կազմակերպվել են գրողների միության ներկայացուցիչների հանդիպումներ՝ մարզերում: Ափինյանը կարևորեց թատրոնի դերը Հայաստանի մշակութային կյանքում։
«Մեր պատմությունը մեզ կանգնեցնում է հարցերի առաջ, որոնց լուծումը միանշանակ չէ: Մենք, ցավոք, պետություն ստեղծելու փորձի հիշողություն չունենք: Դա շատ բարդ գործ է: Դա է ամենակարևորը»,- ասաց Ե. Մանարյանը։ Նրա խոսքով` հիմնադրամի առավելությունն այն է, որ դրա անդամները իրենք են որոշելու իրենց անելիքը: «Սա կենդանի օրգանիզմ պետք է լինի, որ կարողանանք մեր պետությունը կայացնել, որ պատասխան տանք ժողովրդին հուզող հարցերին»:
Ռ. Դավոյանն էլ ասաց, որ յուրաքանչյուր մշակութային հիմնադրամ նպատակային ձևով աշխատելու դեպքում մեծ դեր կարող է խաղալ: Նա նշեց, որ հիմնադրամը պետք է կարևորն անկարևորից զատի, հակառակ պարագայում՝ դրա գոյությունը կդառնա անկարևոր:
Նրա խոսքով՝ հիմնադրամը պետք է քաջալերի երիտասարդ ստեղծագործողներին: «Հիանալի կլինի, որ մշակույթի տարբեր ճյուղերն իրար միանան: Ինքը հիմնադրամում է նրա համար, որ իր ակնկալիքները հաշվի առնվեն, հակառակ դեպքում՝ ինքն առաջիններից կլինի, ով կլքի հիմնադրամի շարքերը:
