Չինաստանը պլանավորել էր զենք մատակարարել լիբիացի առաջնորդ Մուամար Քադաֆիի գլխավորած ուժերին` շրջանցելով ՄԱԿ-ի արգելքը: Նման եզրակացության է եկել կանադական The Globe and Mail պարբերականի լրագրողն իր տրամադրության տակ հայտնված փաստաթղթերի հիման վրա:
Փաստաթղթերի համաձայն` Չինաստանի զենք արտադրող պետական ընկերությունները պատրաստ են եղել Քադաֆիին և նրա գլխավորած ուժերին 200 մլն դոլարի զենք և զինամթերք փոխանցել հուլիսի վերջին: Ջամահիրիայի ղեկավարին զենքի մատակարարումը Չինաստանը պլանավորել էր իրականացնել Ալժիրի և ՀԱՀ-ի միջնորդությամբ: Այս տեղեկությունը հաստատել են Լիբիայի Ազգային անցումային խորհրդի (ԱԱԽ) ներկայացուցիչները:
ԱԱԽ-ի զինվորական կոմիտեի ղեկավար Օմար Հարիրիի խոսքերով, փաստաթղթերում առկա տեղեկությունները բացատրում են Քադաֆիի ուժերի տրամադրության տակ եղած նոր զինամթերքի առկայությունը: «Երևի հենց այս զինամթերքն էլ օգտագործվել է մեր ազգաբնակչության դեմ»,- ասել է Հարիրին` նշված փաստաթղթերն ուսումնասիրելուց հետո:
Հայտնաբերված թղթերում մանրամասն ներկայացված է լիբիական պատվիրակության այցելությունը Չինաստան հուլիսի 16-ին: Այցելության ժամանակ Լիբիայի ուժային կառույցների ներկայացուցիչները հանդիպել են Չինաստանի զենք արտադրող երեք ընկերությունների` China North Industries Corp.-ի (Norinco), China National Precision Machinery Import & Export Corp.-ի (CPMIC) և China XinXing Import & Export Corp հետ: Զենքերի թվում, որոնք չինական կողմը պատրաստ էր տրամադրել, կային նաև հրթիռներ և հրթիռային համակարգեր: Ինչպես նշում է The Globe and Mail-ը, չինացիները Քադաֆիին կարող էին մասնավորապես տրամադրել QW-18 տեսակի հրթիռային համակարգ: Իր տեխնիկատակտիկական հատկանիշներով այն հավասար է ամերիկյան «Սթինգեր» համակարգին և կարող է խոցել ուղղաթիռներ և ինքնաթիռներ:
Չորսէջանոց փաստաթուղթը լրագրողները հայտնաբերել են Տրիպոլիի Բաբ-Աքքարա շրջանի աղբամանից, որտեղ բնակվել են Քադաֆիի կողմնակիցները: ԱԱԽ ներկայացուցիչները հաստատել են համաձայնության իսկությունը` նրանում մատնանշելով Լիբիայի մատակարարումների բլանկի կնիքն ու տեքստի ստանդարտ ձևավորումը:
Չինաստանի ԱԳՆ-ն, ըստ France Presse գործակալության, հերքել է Քադաֆիի ուժերին զենք տրամադրելու ինֆորմացիան: Ալժիրի և ՀԱՀ-ի ներկայացուցիչները հրաժարվել են մեկնաբանել կանադական պարբերականի ներկայացրած փաստերը:
Միևնույն ժամանակ, The New York Times-ը ներկայացնում է Բելգիայում ՆԱՏՕ-ի ներկայացուցչի խոսքերը, որը կասկածի տակ է դրել Չինաստանի կողմից Քադաֆիին զենք տրամադրելու հանգամանքը: ՄԱԿ-ի ներկայացուցիչները նույնպես նշել են, որ իրենց ուշադրության կենտրոնում Չինաստանի կողմից զենք մատակարարելու որևէ համաձայնություն չի հայտնվել:
