Գրեթե չորս ամիս առաջ ԱՄՆ-ում բացահայտված ռուսական լրտեսական խմբի անդամներին Ռուսաստանի նախագահը պետական պարգեւներ է շնորհել: Այս մասին հաղորդում է CNN-ը:
Արարողությունը տեղի է ունեցել երկուշաբթի Կրեմլում, որի մասին հաղորդել է Կրեմլի խոսնակ Նատալյա Տիմակովան: Մրցանակներ են շնորհվել Ռուսաստանի արտաքին հետախուզության ծառայության աշխատակիցներին, այդ թվում` նրանց, ովքեր աշխատել են Միացյալ Նահանգներում եւ Ռուսաստան են վերադարձել հուլիսին:
Այս մասին լրատվամիջոցները տեղեկատվություն տարածել են, սակայն որեւէ տեսանյութ դեռ չկա:
Հիշեցնենք, որ հուլիս ամսին մեծ սկանդալ էր ծագել ԱՄՆ եւ Ռուսաստանի միջեւ` կապված ԱՄՆ-ում բացահայտված ռուսական խոշոր ռեզիդենտական խմբի հետ: Բացահայտումից մի քանի օր անց լրտեսական այս խմբի անդամները խոստովանել էին, որ հակաօրինական գործողություններ են իրականացրել: ԱՄՆ իրավապահները դրանից հետո այս խմբի անդամներին հանձնեցին ռուսական կողմին:
