Շրջափակման 53-րդ օրը Ստեփանակերտում նարինջ, մանդարին և գազար է վաճառվում, մինչդեռ «Հայաստան» հիմնադրամի կողմից Արցախին հրատապ մարդասիրական աջակցություն ցուցաբերելու ծրագրի շրջանակներում նվիրաբերած 100 տոննա պարենային մթերքը շարունակում է գտնվել Գորիսում: Նշվում է, որ ռուս խաղաղապահ զորակազմի հրամանատարության հետ բանակցություններ են տարվում ստեղծված ճգնաժամային իրավիճակում հումանիտար բեռն Արցախի Հանրապետություն հասցնելու ուղղությամբ:
ՀՀ Արցախի մշտական ներկայացուցչությունից «Առաջին լրատվական»-ին փոխանցեցին, որ ռուս խաղաղապահն է մանդարին, գազար Արցախ հասցրել:
«Ինքն իր կողմից տարել է, իսկ «Հայաստան« համահայկական հիմնադրամի ուղեբեռը մնում է Գորիսում, որովհետև Ադրբեջանը չի թողնում այդ ուղեբեռը մտնի Ստեփանակերտ: Այսինքն ՝ ադրբեջաբնական կողմն է արգելում բեռի մուտքը, ոչ թե ռուսական կողմը: Ադրբեջանն է փակել ճանապարհը, Ադրբեջանն է արգելում արցախցիների վերադարձն Արցախ: Իսկ Կարմիր Խաչն ու ռուս խաղաղապահները փորձում են որպես երրորդ կողմ, մաքսիմալ չեզոք, ինչ-որ ձևով հաղորդակցություն ապահովել: Կարմիր խաչը՝ դեղորայքի ու հիվանդների պահով, իսկ ռուս խաղաղապահները՝ պարենամթերք և բացառության կարգով մանդարինը եղավ:
Թող թյուր կարծիք չլինի, որ բացվել է ճանապարհը, տանում են ամեն ինչ: Շատ լավ կլիներ, որ այդպես լիներ, բայց ցավոք, այդպես չէ, փակ է ճանապարհը և շարունակում է մնալ փակ»,-ասացին ներկայացուցչությունից:
Այնուամենայնիվ, նշեցին, որ ռուս խաղաղապահներն էլ են Ադրբեջանի հետ բանակցում, Կարմիր խաչն էլ է առանձին բանակցում: Իսկ պահանջարկը մի քանի անգամ գերազանցում է Արցախ մտած չնչին օգնություններին, որ հասնում է Արցախ Կարմիր Խաչի ու ռուս խաղաղապահների միջոցով:
«Որևէ ժամկետ չկա, թե երբ այդ օգնությունը կհասնի Ստեփանակերտ: Ոչ միայն «Հայաստան» հիմնադրամի 100 տոննա բեռն է Գորիսում, ևս 250 տոննա բեռ կա ամբողջ Սփյուռքից, Հայաստանի տարբեր կառույցներից, ՀԿ-ներից, որոնք նույնպես ամբարված են Գորիսում: Երեխաների Ամանորի նվերները տասնյակ հազարավոր նվեր-փաթեթներ են, որոնք մինչև հիմա Գորիսում են, չեն հասել Արցախ, որովհետև Ադրբեջանը համագործակցում է միայն Կարմիր խաչի և ռուս խաղաղապահների հետ: Որևէ մեկի հետ կոնտակտի դուրս չի գալիս, չի թողնում անցել ու վերջ»,-հավելեցին ներկայացուցչությունից:
«Առաջին լրատվական»-ի հարցերին պատասխանել է Արցախի Ազգային ժողովի «Ազատ հայրենիք-ՔԴՄ» խմբակցության ղեկավար Արթուր Հարությունյանը մեզ հետ զրույցում նշեց, որ հիմա առաջին անհրաժեշտության բեռներն է հումանիտար բեռներով գալիս:
«Ես, ճիշտն ասած, տեղյակ չեմ, թե «Հայաստան» համահայկական հիմնադրամի բեռներում ինչ ապրանքներ են, բայց այս պահին առաջին անհրաժեշտության ապրանքները 5 տեսակի ապրանքներն են, որոնք կտրոններով տրամադրվում են, և նաև որոշ տնտեսական ապրանքներ, այսինքն կենսական ապահովումն ապահովելու համար առաջին անհրաժեշտության ապրանքներն են գալիս այս պահին հումանիտար բեռներով:
Հատկանշական է, որ հումանիտար բեռը մնացել է Գորիսում, բայց երբ բիզնես նպատակներ կան, Արցախում վաճառվում են մանդարին ու գազար:
Հարությունյանը նշեց, որ արմիր խաչի և խաղաղապահների միջոցով է հասնում.
«Դա բացարձակ սուտ տեսակետ է, այսօր օպերատիվ շտաբի կողմից բավականին ուսումնասիրվում են այն ապրանքատեսակները, որոնք առաջին անհրաժեշտության են նվազագույն կենսական պայմաններն ապահովելու համար, դրանք տեղափոխվում են»:
«Առաջին լրատվական»-ի հետ զրույցում Արցախի Ռամկավար Ազատական Կուսակցության նախագահ, քաղաքագետ Բարդուղ Գալստյանը նշեց, որ մանդարին և գազար բերողները ռուսներն են, որոնք առևտուր են անում,.
«Սա իրենց համար հարմար տարբերակ է, իրենց մեքենաներով բերում են գյուղաջակցության հիմնադրամի պահեստներ, որտեղից էլ բաժանում են խանութներին: Իսկ թե ով է այսմ ամենի միջնորդը, չեմ կարող մանրամասն ասել»,-հավելեց Գալստյանը:
