Human Rights Watch իրավապաշտպան կազմակերպությունը տարեկան իր զեկույցում, անդրադառնալով Հայաստանին, շեշտում է՝ քաղաքական լարվածությունը և Լեռնային Ղարաբաղի հակամարտության չկարգավորված լինելու պատճառով առաջ եկած անվտանգության խորացող խնդիրները գերակայում են Հայաստանի զարգացումներում: Զեկույցը փաստում է՝ Ռուսաստանի միջնորդությամբ զինադադարը մի քանի անգամ խախտվել է Ադրբեջանի կողմից Լեռնային Ղարաբաղ և Հայաստան ներխուժմամբ, իսկ անկանոն ռազմական միջադեպերը շարունակում են սպառնալ Լեռնային Ղարաբաղի և հարակից մի քանի շրջանների գյուղերի ու Հայաստան-Ադրբեջան սահմանի երկայնքով բնակվող խաղաղ բնակչության անվտանգությանն ու կյանքին: Անցած տարվա սեպտեմբերյան ընդհարումների արդյունքում տեղահանվել է շուրջ 7,600 խաղաղ հայ բնակիչ, հիմնականում կանայք և երեխաներ, նշում է զեկույցը՝ վկայակոչելով հայկական կողմի տվյալները: Թեմայի շուրջ «Առաջին լրատվական»-ը զրուցել է իրավապաշտպան Ժաննա Ալեքսանյանի հետ:
Վերջինս նշեց, որ HRW-ի զեկույցը շատ կարևոր է և հաշվի են առնում տարբեր կառույցներում․ «Եղել է դեպք, որ HRW-ի զեկույցի հիման վրա պատժամիջոցներ են կիրառել: HRW-ի զեկույցը կարող է Ադրբեջանի նկատմամբ պատժամիջոցներ կիրառելու հիմք դառնալ»:
