2022 թվականի հուլիսի 1-ից մինչև նոյեմբերի 15-ը ներառյալ ընկած ժամանակահատվածում Կոռուպցիայի կանխարգելման հանձնաժողովի կողմից հարուցվել է հայտարարագրմանն առնչվող վարչական իրավախախտումների վերաբերյալ 88 վարույթ, անհամատեղելիության պահանջների առերևույթ խախտման վերաբերյալ 1, ինչպես նաև անհամատեղելիության պահանջների առերևույթ խախտման և շահերի բախման առերևույթ դեպքի վերաբերյալ թվով 1 համապատասխան վարույթ: Հարուցված վարչական իրավախախտման վերաբերյալ վարույթներից 87-ը հարուցվել է «Հանրային ծառայության մասին» օրենքով սահմանված ժամկետները լրանալուց հետո՝ 30 օրվա ընթացքում, Հանձնաժողովի գրավոր ծանուցման հիման վրա հայտարարագիր չներկայացնելու խախտումների հիմքով, 1-ը՝ հայտարարատուի կողմից հայտարարագրում անզգուշությամբ սխալ կամ ոչ ամբողջական տվյալ ներկայացնելու հիմքով:
Հայտարարագիր չներկայացնելու հիմքով վարչական իրավախախտման վերաբերյալ վարույթներ հարուցվել են համայնքների ղեկավարների, համայնքների ղեկավարների տեղակալների, համայնքապետարանների աշխատակազմերի քարտուղարների, ավագանու անդամների, մաքսային ծառայության գլխավոր պաշտոն, ինչպես նաև ինքնավար, հայեցողական պաշտոն զբաղեցնող անձանց նկատմամբ: Հայտարարագրերի վերլուծության արդյունքում հայտնաբերված խախտումների հիմքով վարույթներ հարուցվել են պատգամավորների, նախարարի պաշտոն զբաղեցրած պաշտոնատար անձանց նկատմամբ:
ժուռնալիստների «Ասպարեզ» ակումբի ղեկավար Լևոն Բարսեղյանը կարծիքով՝ կանխարգելող միջոցառումները բավականին լավ են իրականացվում
«Հակակոռուպցիոն կոմիտեն իր համակարգում պահում, փայփայում ու գորգուրում է բազմաթիվ աշխտակիցների, որոնք եղել են ՀՔԾ-ի համակարգում և մասնակից են եղել քաղաքացիների դեմ քաղաքական հալածանքների կազմակերպմանն ու սպասարկմանը: Այդ մարդիկ առանց զատման ու զտման շարունակում են իրենց «փառահեղ» գործունեությունը կոռուպցիայի հետապնդման այդ մարմնում: Սա դատապարտելի է»,-ասաց Բարսեղյանը:
2023 թվականից ուժի մեջ կմտնի քաղաքացիների եկամուտների համընդհանուր հայտարարագրման պահանջը: Բարսեղյանի կարծիքով՝ համընդհանուր հայտարարագրումը լավ բան է, անշուշտ, որը կիրառվում է շատ երկրներում կոռուպցիայի դեմ պայքարում, պարզապես պետք է իմանալ, որ այդ մարմինը գործ է ունենալու ահռելի, աննախադեպ ծավալի տեղեկությունների հետ, այդ տեղեկություններն առաջին մի քանի տարիներին պարունակելու են բարեխիղճ անճշտություններ, թյուրիմացություններ, սխալմունքներ:
«Կիմանանք, որ շատ հաճախ մարդիկ հանդիպում են տեխնիկական բարդությունների այդ տվյալները լրացնելու հետ կապված, կադաստրի վկայականից ինչ-որ բան սխալ արտագրելու հետ կապված և այլն: Ահռելի ծավալի մեգա դատա է հավաքվելու, և այդ տվյալների մշակման հետ կապված ևս բարդություններ են լինելու՝ դրանք համակարգելու, անհամապատասխանությունները գտնելու առումով, աղջկա սկեսրայրի անունով գրված գույքը հայտնվելու է եսիմ ում քեռու տղայի մոտ: Սա հաշվի առնելով՝ առաջին մի քանի տարիներին արդյունավետ աշխատանք։ սպասելը շատ միամիտ բան կլինի: Դրա համար ահռելի փողեր պետք է դրվեն՝ համակարգի կատարելագործման, հայտարարագրման և դրանց վերլուծությունների մեխանիզմը արդյունավետ գործի դնելու համար»,-ասաց նա:
Այդ վերլուծություններից հետո, Բարսեղյանի խոսքով, խախտումների, դիտավորությունների բացահայտման դեպքում, դա պետք է գնա Կոռուպցիայի կանխարգելման հանձնաժողովի կոմից վարույթներ հարուցելու մեխանիզմին:
«Այսինքն՝ այն ամենը, ինչ անում է այդ մարմինը մի քանի հազար պաշտոնյայի և ՏԻՄ պաշտոնյաների հետ կապված, դա բազմապատկվելու է անհամեմատ մեծ թվով, ահագին բարդ գործ է սպասվում, բայց դա անխուսափելի է և որքան շուտ արվի, այնքան լավ: Մյուս կողմից հանրության կողմից նույնպես բողոքներ են լինելու, առավել ևս մեծ կապիտալ ունեցողներն են բողոքելու: Հիմա տեսեք, ապօրինի գույքի բռնագանձման հարցով եղած-չեղածը վերագրվում է նախկին, ներկա պաշտոնյաներին, բայց ինչքան մարդ կա, որ ունի ապօրինի կապիտալ, բայց այդ քննությունների պոտենցիալ ցանկում չկան: Հայտարարագրման համակարգի ներդրման հետ լիքը հարցեր են առաջանալու: Գործարար աշխարհի տարբեր ներկայացուցիչներ, որոնք երբեք պաշտոնյա չեն եղել, բարեգործական հիմնարկների աշխատակիցներ, որոնք նույնպես երբեք պաշտոնյաներ, զինվորականներ, որոնք երբեք պաշտոնյան չեն եղել, և իրենց կուտակած երբեմն կասկածելի կապիտալը հայտնվելու է հայտարարագրերում, հետաքննչական հետաքրքրություն է ունենալու, եթե հանձնաժողովն ունենա բավարար միջոցներ և իհարկե, բարեխղճություն: Ընդդիմությունը շահարկելու է սա, ասելու է՝ խեղճ մարդկանցից ինչ եք ուզում, կով է, պահում է, ինչ եք մտել իրենց տուն: Վերցնելու են պոպուլիզմի դրոշը և պայքարեն ընդդեմ հակակոռուպցիայի դեմ պայքարի»,-նշեց Բարսեղյանը: