Արցախի Հանրապետության նախագահ Արայիկ Հարությունյանը հոկտեմբերի 1-ին հանդիպել է ԱՀ խորհրդարանական ուժերի ներկայացուցիչների հետ։ Արցախի նախագահի մամուլի ծառայությունը հայտնում է, որ քննարկումների արդյունքում խորհրդարանական ուժերի կողմից առաջարկվել է հրավիրել ԱՀ անվտանգության խորհրդի նիստ։
Բացի այդ, հանդիպմանը քննարկվել են Արցախի Հանրապետության շուրջ արտաքին քաղաքական վերջին զարգացումները և առկա մարտահրավերների հաղթահարման ուղղությամբ ձեռնարկվելիք հնարավոր քայլերը։
Արցախի խորհրդարանի «Միասնական հայրենիք» խմբակցության պատգամավոր Սեյրան Հայրապետյանն «Առաջին լրատվական»-ի հետ զրույցում ասաց, որ ԱՀ անվտանգության խորհրդի նիստին այսօր է անցկացվելու, մասնակցելու են խորհրդարանական խմբակցությունների ղեկավարները։
Թե՞ ինչ հարցեր են քննարկելու, Հայրապետյանն ասաց, որ պաշտոնական հաղորդագրություն են տարածելու։ Մեր այն հարցին, թե ինչն է մտահոգել խորհրդարանականներին, պատգամավորն ասաց․ «Ոչ միայն խորհրդարանականներին, այլ Արցախի ժողովրդին, իսկ մենք օժված են Արցախի ժողովրդի մանդատով, մտահոգում են անվտանգային հարցերը, բանակցային գործընթացները, ինչպես նաև շատ կարևոր հարցեր, որոնք կարող են հիմք հանդիսանալ Արցախի հետագա ճանաչման, անկախության, ինչպես նաև բնակչության հանգիստ գոյատևելու համար»։
Հետաքրքվեցինք՝ արդյոք առաջացել են հրատապ հարցեր, թե քննարկվելու են միայն ընթացին խնդիրները, պատգամավորը պատասխանեց․«Ե՛վ հրատապ և՛ ընթացիկ։ Հանդիպումից հետո արդեն ավելի կոնկրետ կարտահայտվենք»։
Մեր այն հարցին, թե կա՞ն մտահոգություններ վարչապետի վերջին հարցազրույցի հետ կապված, Սեյրան Հայրապետյանը նշեց․ «Խորհրդարանականների առաջարկն ամեն ինչի հետ էլ կապ ունի։ Ե՛վ հարցազրույցի, և՛ ստեղծված իրավիճակի։ Կան նաև հարցեր որի մասին հնարավորինս կտեղեկացնենք»։
Դիտարկմանը, թե խորհրդարանականները՝ ընդդիմությունն ու իշխանությունը միասնակա՞ն են այս հարցում, Սեյրան Հայրապետյանը պատասխանեց․ «Ընդհանրապես ինչ վերաբերում է Արցախի ճակատագրին, անվտանգային հարցերին, փորձում ենք միասնական լինել։ Կան սկզբունքային տարբերություններ, ինչ-որ նպատակի հասնելու ճանապարհի հետ կապված, բայց ընդհանուր վերջնանպատակի վերաբերյալ փորձում ենք հնարավորինս միասնական լինել»,-եզրափակեց նա։
