Մոտ մեկ շաբաթ առաջ տեղեկացրել էինք, որ ՀՀ ոստիկանության Ճանապարհային ոստիկանության գումարտակի հրամանատար, գնդապետ Ստեփան Արամի Կարախանյանի դեմ հատուկ քննչական ծառայությունում քրեական գործ է հարուցվել` 57 միլիոն դրամի բենզինի յուրացման կասկածանքով:
Մեր աղբյուրը հաղորդել էր նաեւ, որ Կարախանյանը Ճանապարհային ոստիկանության պետ Մարգար Օհանյանի հովանավորյալներից է, եւ չէր բացառել, որ յուրացումը կատարվել է վերջինիս գիտությամբ: Մարգար Օհանյանի երեկվա ձերբակալությունը փաստորեն կարծես թե հաստատում է այդ լուրի իսկությունը: Նշենք նաեւ, որ Ստեփան Կարախանյանը ձերբակալությունից խուսափելու համար տեղափոխվել էր հիվանդանոց` պատճառաբանելով, թե շաքարն է բարձրացել:
Սպասվում էր, որ ժամերի ընթացքում Կարախանյանը բերման կենթարկվի, քանի որ որոշումն արդեն կայացված է, սակայն օգոստոսի 30-ին «Առաջին լրատվական»-ին հայտնի դարձավ, որ Ստեփան Կարախանյանը ցուցմունք է տվել շեֆի դեմ ու գրավով ազատ արձակվել: Գրավի չափը պարզել չհաջողվեց: