Թուրքական Sabah թերթի փոխանցմամբ՝ Թուրքիայի վարչապետ Էրդողանը հեռուստատեսային եթերում հայտարարել է, որ իրենք շարունակելու են Իրաքի հյուսիսի ավիացիոն ռմբակոծությունները, որոնց թիրախում են գտնվում այդտեղ բազավորված Քրդստանի աշխատավորական կուսակցության (PKK) ճամբարները.
«Մենք թևակոխել ենք ահաբեկչության դեմ պայքարի նոր շրջան։ Ռազմական գործողությունները շարունակվելու են։ Թուրքիան ի վիճակի է պատասխանել յուրաքանչյուր մարտահրավերի։ Թուրքիան դիմակայելու է բոլոր գլոբալ մարտահրավերների։
Մենք հանդես ենք գալիս այն ուժերի դեմ, ովքեր, հանուն սեփական շահերի, հրահրում են տարածաշրջանային հակամարտություններ, շահագործում են համաշխարհային բնական պաշարները, չեն արժևորում մարդկային կյանքը»։
Հիշեցնենք, որ Հյուսիսային Իրաքի ավիացիոն և հրետանային ռմբակոծությունները մեկնարկել են օգոստոսի 17-ին, երբ PKK-ն Հաքքարիի նահանգում սպանեց 8 և վիրավորեց 11 զինծառայողի։
Ավելի վաղ PKK-ն սպառնացել էր ռմբակոծությունների շարունակման դեպքում պատերազմ հայտարարել թուրքական իշխանություններին։
Ըստ Թուրքիայի գլխավոր շտաբի տվյալների՝ օգոստոսի 17-22-ն ընկած ժամանակահատվածում Հյուսիսային Իրաքի օդային և հրետանային ռմբակոծությունների արդյունքում սպանվել է 145-160 քուրդ զինյալ։ Բացի այդ՝ վիրավորվել է ավելի քան 100 PKK-ական։
