Հայկական և Իրանական խոհանոցի բազմազան յուրօրինակ ուտեստների ներկայացում, երգ, պար, երաժշտություն, արվեստի գործերի և արհեստագործական արտադրանքների ցուցադրություն, լազերային շոու և աստղադիտում «Զորաց Քարեր» պատմամշակութային արգելոցում: Այս ամենը հնարավոր կլինի վայելել Սյունիքի մարզի Սիսիան քաղաքում օգոստոսի 10-11-ը, որտեղ կանցկացվի «Նավասարդ» խորագրով հայ – իրանական մշակութային, խոհանոցային փառատոնը։
«Արմենպրես»–ի մամուլի սրահում հրավիրված ասուլիսում Տուրիզմի հայկական ֆեդերացիայի նախագահ Մեխակ Ապրեսյանը նշեց, որ միջոցառումը ուղղված է հետկորոնավիրուսային ժամանակահատվածում նոր ձևավորված շուկայում զբոսաշրջային առավել մրցունակ դիրքեր ունենալուն:
«Կորոնավիրուսից հետո համաշխարհային շուկան նոր է ձևավորվում, և զբոսաշրջությունը կարևորող բոլոր երկրները անելու են ամեն ինչ այս նոր շուկան դեպի իրենց կողմ գրավելու համար: Այս միջոցառումը, համոզված ենք, որոշակիորեն նպաստելու է դրան: Սա նաև մեծ նշանակություն է ունենալու զբոսաշրջությունը Երևանից դեպի մարզեր տանելու գործընթացի համար, ինչպես նաև այս փառատոնը հնարավորություն է տալու Սիսիան քաղաքին ներկայացնել իր զբոսաշրջային ամբողջ ներուժը»,- ասաց Մեխակ Ապրեսյանը:
Նա ընդգծեց, որ ոչ տեղացի զբոսաշրջիկներին տեղեկացնելու և ներգրավելու նպատակով միջազգային գործընկերների ներգրավմամբ միջոցառման գովազդ է իրականացվում Իրանում: Գովազդային արշավներ սկսվել են նաև սոցցանցերում:
«Առաջին օրվա ընթացքում փառատոնի մասնակից հայկական և իրանական թիմերը տաղավարներում կպատրաստեն և կներկայացնեն իրենց խոհանոցի բազմազանությունն ու պատմությունը՝ սկսած Ուրարտա – Աքեմենյան ժամանակաշրջանից։ Մշակութային և երաժշտական գոտիներում կներկայացվեն երգ, պար, երաժշտություն, արվեստի գործեր, արհեստագործական արտադրանք։ Մինչ փառատոնի վերոնշյալ հիմնական մասը՝ կկազմակերպվի մրցույթ մասնակից թիմերի միջև տարբեր անվանակարգերով, իսկ փառատոնի ավարտին տեղի կունենա մրցանակների շնորհման արարողություն: Սիսիան քաղաքում իրականացվող միջոցառումների ընթացքում կլինի նաև լազերային շոու և Քաղաքապետարանի շենքի վրա կցուցադրվի «Հայկ» համաստեղության ծնունդը »,-ասաց նա:
Տուրիզմի հայկական ֆեդերացիայի նախագահն ընդգծեց, որ օգոստոսի 11- ին ժամը 03:00-05:00 նախատեսվում է այցելություն «Զորաց Քարեր բնակատեղի» պատմամշակութային արգելոց՝ աստղային դիտման նպատակով, որտեղ լարային քառյակը կներկայացնի նաև դասական երաժշտություն։ Ժամը 04:00-ին «Հայկ» համաստեղության ծագման պահին ջութակով կհնչի Կոմիտասի «Կռունկ»-ը։
Մեխակ Ապրեսյանը ասաց, որ զբոսաշրջիկներին ընդունելու, նրանց գիշերակացը ապահովելու ուղղությամբ էլ բնակիչների հետ տարվում են մի շարք աշխատանքներ, որպեսզի ներգրավեն Սյունիքի մարզի հյուրանոցային և տուրիստական ողջ ներուժը և բարձր մակարդակով ընդունեն հյուրերին:
«Հայ խոհարարական ավանդույթների զարգացման և պահպանման» հասարակական կազմակերպության նախագահ Սեդրակ Մամուլյանն ընդգծեց, որ իրանական խոհանոցի հետ շատ ընդհանրություններ ունենք, և այդ ներուժը օգտագործելը կնպաստի մեր փոխադարձ կապերի ամրապնդմանը:
«Միջոցառման ընթացքում մենք տոնելու ենք «Նավասարդ»-ը: Ասեմ, որ Քրիստոնեություն ընդունելուց առաջ այս տոնը նշվել է, նշվել է նաև իրանցիների հետ, և մենք այժմ ցանկանում ենք վերականգնել այդ ավանդույթը: Նշեմ, որ ընդհանրապես մեր տոները՝ լինեն դրանք եկեղեցական, թե ժողովրդական, շատ լուրջ զբոսաշրջային արդյունք են տալիս, քանի որ ներառում են խոհանոցային, բանահյուսական, մշակութային և սպորտային լուրջ տարեր, որոնք ներկայացնում են մեր ազգային կերպարը»,- ասաց նա:
Սեդրակ Մամուլյանն ասաց, որ միջոցառումը բաղկացած է մի քանի մասից: Մեկը կլինի հենց խոհարարական, որին կմասնակցեն երկու կողմերը, կներկայացնեն իրենց կերակրատեսակները: «Մենք մի փոքր ուղղորդել ենք, որ ծիսական կերակրատեսակ համարվող Նավասարդի հարիսան, «Կորկոտը» և համարժեք իրանական կերակուրը՝ «Հալիմը», կլոր գաթան, որը խորհրդանշում է արևը և, իհարկե, մեր բոլոր տոնական սեղաններին բնորոշ տոլման պարտադիր լինեն ներկայացված: Մնացածի ընտրության մեջ մասնակիցներն ազատ են»,- ասաց նա:
ՀՀ զբոսաշրջության կոմիտեի նախագահ Սիսիան Պօղոսեանը նշեց, որ նման փառատոնների անցկացումը կարևոր նշանակություն ունի երկու երկրների զբոսաշրջության զարգացման գործում:
«Պետք է ասեմ, որ Իրանը մեր թիրախային շուկաներից մեկն է, և այս պահին մենք այնտեղից բավականին մեծ թվով զբոսաշրջիկներ ունենք: Ամեն ինչ անում ենք, որ նմանատիպ փառատոնների միջոցով նույնպես հետաքրքիր ծրագրեր իրականացնենք, որպեսզի մեր հարևան երկրներից մշտապես մեծ զբոսաշրջային շարժ ունենանք»,-ասաց նա: