Աշխատանքային այցով Ստրասբուրգում գտնվող ՀՅԴ Հայաստանի Գերագույն մարմնի ներկայացուցիչ «Դիմադրություն» շարժման համակարգող Իշխան Սաղաթելյանը հանդիպումներ է ունեցել Եվրոպական խորհրդարանի պատգամավորներ, ՀՀ-ԵՄ խորհրդարանական համագործակցության հանձնաժողովի անդամ Պետեր Վիտանովի, Եվրոպական խորհրդարանում Հայաստանի հետ բարեկամության խմբի նախագահ Լուկաս Ֆուրլասի, խորհրդարանի ECR քաղաքական խմբի փոխնախագահ Չառլի Վայմերի և Եվրոպական Խորհրդարանի փոխնախագահ Հեիդի Հաութալայի հետ։
ՀՅԴ հանրային կապերի գրասենյակից հայտնում են, որ հանդիպումների ընթացքում քննարկվել են Հայաստանի ու Արցախի շուրջ առկա անվտանգային մարտահրավերները և ադրբեջանական շարունակական ագրեսիան։
Եվրոպացի գործընկերներին են ներկայացվել նաև «Դիմադրության» շարժման նպատակներն ու առաջիկա ծրագրերը, քննարկվել է Հայաստանի ներքաղաքական իրավիճակը։
Ուշագրավ է պաշտոնական հաղորդագրության այն հատվածը, երբ Եվրոպան «Դիմադրության» շարժման համար ներկայացվում է որպես գործընկեր։ Շարժման մասնակիցներն իրենց ակցիաների ամենասկզբից իշխանություններին զուգահեռ պայքարում էին նաև Եվրոպայի և ԱՄՆ-ի դեմ։ «Հայաստան» և «Պատիվ ունեմ» խմբակցության պատգամավորները բազմաթիվ բողոքի ցույցեր են անցկացրել Հայաստանում Եվրամիության ներկայացուցչության շենքի մոտ, բողոքել Հայաստանում ԵՄ և ԱՄՆ դեսպանների գործունեության դեմ, այսօր սակայն «եվրոպացի գործընկերներին ներկայացնում են իրենց անելիքները»։
Երբ վարչապետ Նիկոլ Փաշինյանը խորհրդարանում հայտարարեց, որ միջազգային գործընկերնները Հայաստանից պահանջում են իջեցնել Արցախի կարգավիճակի նշաձողը, ընդդիմությունն իսկույն այդ պահանջը վերագրեց արևմուտքին և ոչ մե ռազմավարական դաշնակցին, որի ղեկավարը բացահայտ և ուղղակի կերպով հայտարարել է, որ Ղարաբաղն Ադրբեջան է։
Սոցիոլոգ Կարեն Սարգսյանը համարում է, որ իրենց ընդդիմադիր ներկայացնող ուժերն այս փուլում հստակ նպատակ ունեն՝ լեգիտիմացնել իրենց ներկայությունը հայաստանյան քաղաքական դաշտում։
Սարգսյանը միևնույն ժամանակ հիշեցնում է, որ ԱՄՆ-ից ու ԵՄ-ից բողոքելուն զուգահեռ այդ նույն ընդդիմադիրները ԱՄՆ դեսպանատանը մասնակցում էին ԱՄՆ անկախության օրվան նվիրված միջոցառմանը․ «Խնդիրն այն է, որ իրենք իրենց փորձում են լեգիտիմացնել։ Ներկայացնում են, թե Եվրոպայում հանդիպումներ են ունենում, լուրջ քաղաքական ուժ են և այդպիսով փորձում ձերբազատվել Ռուսաստանի գործակալ լինելու պիտակից, որն իրենց վրա կախված է և որը բացարձակ ճշմարտություն է։ Սա բոլոր գործակալների տիպիկ ճանապարհ է՝ ձև անել, թե գնում են Եվրոպպա հանդիպումներ են ունենալու և ոչ թե Ռուսաստանի գործակալներ են այլ լուրջ քաղաքական ուժ»,-«Առաջին լրատվական»-ի հետ զրույցում ասաց նա։
Սարգսյանի խոսքերով՝ հիշյալ քաղաքական ուժերը վաղուց հեռացել են քաղաքական ասպարեզից․ «Խնդիրը հետևյալն է․ իրենք հասկանում են, որ մինչև մյուս ընտրություններ իրենք որպես քաղաքական ուժ ոչնչանալու են։ Գալիք ընտրություններն, ինչպիսին էլ, որ լինեն, իրենք հիմնական ուժ չեն լինելու։ Իրենք հիմա ակտիվորեն ձգտում են հասնել նրան, որ այլ քաղաքական ուժեր դաշտում ի հայտ չգան, քաղաքական դաշտն այնքան են կեղտոտում, որ ոչ ոք չցանկանա մտնել։ Միայն այդ պարագայում իրենք կարող են մնալ քաղաքական ասպարեզում։ Եվ քանի որ իրենք ունեն ԶԼՄ-ներ՝ դա միանգամայն հնարավոր է անել։ Իրենք հասարակության մոտ չունեն քաղաքական հենարան, չկա այնպիսի զանգված, որը կարող է իրականում ազդել ընտրությունների արդյունքների վրա, բայց ունեն շատ ԶԼՄ-ներ։ Երբ դրսից նայում են Հայաստանին, իրենց ներկայացուցիչներն էլ գնում դրսում հանդիպումներ են ունենում՝ ստեղծվում է մեդիա տպավորություն, որ իրենք դեռևս կենդանի են։Իսկ ճշմարտությունը հետևյալն է․ ինչպես ասում են՝ հիվանդն ավելի շուտ մահացել է, քան կենդանի է»։
Մեր զրուցակիցը շեշտում է՝ այդ ուժերը Ռուսաստանի գործակալ են և անկախ իրենց քայլերից՝ այդ ճշմարտությունը չի փոխվում․ «Ամենայն հավանականությամբ՝ Ռուսաստանի տնտեսական, քաղաքական ու ռազմական խնդիրների պատճառով իրենց ֆինանսավորումը կտրվել է։ Ես շատ հնարավոր եմ համարում, որ իրենք փորձեն եվրոպական ինչ-որ հիմնադրամներից ստնալ աջակցություն՝ որպես ընդդիմություն, որովհետև Եվրոպան միշտ էլ ընդդիմությանն ինչ-որ կերպ աջակցում է։Ուստի կփորձեն Եվրոպայից այդ գումարներն էլ վերցնեն ու մսխեն, իրենցով անել, որ հանկարծ նոր ուժ չձևավորվի, որը կկարողանա Եվրոպայից ֆինանսական ու բարոյական աջակցություն ստանալ։ Մեծ հաշվով՝ ցանկացած դեպքում ընդդիմությունն ընդիմություն է։ Ավելի կարևոր է ընդդիմության լինելը, քան ընդդիմության ով լինելը»։
Սարգսյանն ընդգծեց՝ Ֆրանսիայում էլ Լե Պենը համարվում է Պուտինի «պրոքսի», բայց միևնույն ժամանակ շարունակում է մնալ ընդդիմություն ու ստանալ գումարներ ընդդիմություն լինելու համար․ «Ուստի այստեղ այն խնդիրը, որ իրենք են լուծում՝ նոր ֆինանսական աղբյուրներ գտնել, նոր իմիջ ձևավորվել և փորձել հանդես գալ ոչ թե որպես բացարձակ ռուսական պրոքսի՝ ռուսական դրոշներով հանրահավաքի դուրս գալով, այլ ներկայանալով որպես հայամետ ուժեր»,-եզրափակեց Կարեն Սարգսյանը։
