Abkhazeti.info-ի փոխանցմամբ՝ Վրաստանի խորհրդարանի փոխխոսնակ Պաատա Դավիթայան այսօր տեղի ունեցած ճեպազրույցի ժամանակ հայտարարել է, որ Աբխազիայի նախկին նախագահ Սերգեյ Բագափշը սպանվել է Կրեմլի պատվերով։
Նրա կարծիքով՝ դրա պատճառն այն է, որ Բագափշը հրաժարվել է Ռուսաստանին հանձնել մի շարք հողակտորներ (Բագափշը ռուսական կողմին հրաժարվել է հանձնել Աբխազիայում գտնվող այն երեք կառավարական ամառանոցները, որոնցում ժամանակին հանգստացել են Ստալինը, Խռուշչովը և Գորբաչովը – 1in.am)։
Պաատան նշել է. «Ամենայն պատասխանատվությամբ հայտարարում եմ, որ Աբխազիայի նախագահ Սերգեյ Բագափշը սպանվել է այն նույն հանցավոր խմբավորումների կողմից, որոնց չհաջողվեց Աբխազիայում հողեր օրինականացնել։ Խոսքը գնում է ռուսական խմբավորումների մասին, որոնց հովանավորում է Կրեմլը։
Հենց վերջինիս պատվերով է սպանվել Սերգեյ Բագափշը։ Այդպիսի ճակատագիր է սպասում նաև այն բոլոր առաջնորդներին, ովքեր կհրաժարվեն Աբխազիայի հողերը հանձնել Ռուսաստանին։ Աբխազների՝ որպես էթնոս, գոյատևելու միակ ճանապարհը Վրաստանի կազմում բնակվելն է։
Այսօր Աբխազիայում տեղի ունեցող նախագահական ընտրությունները հանդիսանում են Վրաստանի Սահմանադրության խախտում։ Այդ ընտրությունները հանցավոր ճանապարհով իշխանության զավթման դասական օրինակ են»։
Հիշեցնենք, որ այս տարվա հունիսի կեսերին Կովկասի հարցերով վրացի փորձագետ Մամուկա Արեշիձեն հայտարարել էր, թե Մոսկվայում կատարված թոքերի վիրահատությունից հետո Բագափշի դեմքին հագցրել են տաք օդով շնչադիմակ՝ նմանատիպ եղանակով սպանելով նրան։
Արեշիձեի տվյալներով՝ Բագափշը տարբեր երկրներում բուժում ստանալու տարբերակներ է ունեցել, սակայն վերջնարդյունքում ամեն ինչ վճռել է ռուսական հատուկ ծառայությունների ղեկավար Սերգեյ Պատրուշևի հեռախոսազանգը։ Պուտինի հանձնարարականով Պատրուշևը զանգահարել է նրան և առաջարկել բուժում ստանալ ռուսական հատուկ ծառայությունների կլինիկայում, ինչն էլ ճակատագրական է եղել Բագափշի համար։
