ԱԺ քառօրյայի օրակարգում է «Դատական օրենսգիրք» սահմանադրական օրենքում փոփոխություններ և լրացում կատարելու մասին» օրենքի նախագիծը։ Այս փոփոխություններով այսուհետՄարդու իրավունքների եվրոպական դատարանի՝ Հայաստանի դեմ կայացրած վճիռները կարող են հիմք հանդիսանալ Հայաստանի դատավորների նկատմամբ կարգապահական վարույթ հարուցելու, ընդհուպ լիազորությունների դադարեցման համար. 5 տարի վաղեմության շեմ կսահմանվի: Պատգամավոր Արուսյակ Ջուլհակյանը արդարադատության փոխնախարար Գրիգոր Մինասյանից հետաքրքրվեց՝ արդյո՞ք օրենսդրական այս փոփոխություններով հնարավորություն է ընձեռվելու Մարտի 1-ի գործերով, որոնցով ունենք արդարացումներ, դատական ակտերի կայացմանը մասնակից դատավորներին ենթակել պատասխանատվության։ Վերջինս նշեց, որ, այո՛, այդպիսի հնարավորություն ընձեռվում է։ «Այս փոփոխության արդյունքում հնարավորություն է ընձեռվում 15 տարի հետ գնալ, ՄԻԵԴ-ի կողմից կայացված վճիռներն ուսումնասիրել, և եթե դրանում արձանագրվեն կոնկրետ դատավորի կողմից դիտավորությամբ կայացված խախտումներ, կարգապահական վարույթի շրջանակներում կարող ենք գործը վերհանել, միջնորդություն ներկայացնել ԲԴԽ և գործող կառուցակարգերով պատասխանատվության ենթարկել կոնկրետ խախտում թույլ տված դատավորներին»,-հավելեց Մինասյանը։ Թեմայի շուրջ «Առաջին լրատվական»-ը զրուցել է ԲԴԽ անդամ Վիգեն Քոչարյանի հետ:
Քոչարյանի դիտարկմամբ` Դատական օրենսգիրքը Եվրոպական դատարանի որոշումների հետ կապված որոշակի կարգավորումներ պարունակում է. «Այն դատավորները, որոնք թույլ են տվել կոպիտ խախտումներ, չպետք է մնան դատավորի կարգավիճակում: Դատական օրենսգիրքը էության առումով չի փոխվում: Նպատակը մեկն է` ձերբազատվել խախտումներ թույլ տված դատավորներից»:
