«Ազատություն» ռադիոկայանին տված հարցազրույցի ժամանակ թուրքահայ լրագրող, Ստամբուլում լույս տեսնող «Ժամանակ» օրաթերթի խմբագիր Արա Գոչունյանն անդրադարձել է հայ-թուրքական արձանագրությունների խնդրին.
«Թուրքիայի նորընտիր խորհրդարանի օրակարգից հանված հայ-թուրքական արձանագրությունները ցանկացած պահի կարող են կրկին օրակարգ վերադառնալ: Արձանագրությունները քննարկումներից դուրս են մնացել ոչ թե պատգամավորների, կառավարության կամ նախագահի նախաձեռնությամբ, այլ՝ ինքնաբերաբար:
Եթե մի խորհրդարանի գումարման շրջանում առաջադրված և վավերացման հասցված չլինեն, դա, ինքնաբերաբար, հաջորդ խորհրդարանի օրակարգից դուրս է մնում։ Օրակարգից դուրս մնալը չի նշանակում, որ ընդհանրապես ջնջված է կամ մեկընդմիշտ մի կողմ է թողնված: Հաջորդ գումարման շրջանի որ փուլում որ անհրաժեշություն լինի, պատգամավորական նախաձեռնությամբ կարելի է վերստին օրակարգ մտցնել:
Պատգամավորական նախաձեռնությունից բացի, արձանագրությունները օրակարգ կարող են վերստին մտցվել նաև կառավարության` այս դեպքում արտգործնախարարության կողմից: Միջոցները բազմազան են, անհրաժեշտ է միայն քաղաքական կամք։ Երբ հասունանա այդ պահը, արդեն ինքնաբերաբար դժվար չէ նորից թարմացնել այդ գործընթացը: Անշրջելի ոչ մի բան չկա այդ ուղղությամբ:
Արձանագրություններն օրակարգում թողնել-չթողնելու կամ դրանց հետագա ճակատագրի վերաբերյալ պաշտոնական որևէ հայտարարություն Անկարայից մինչև օրս չի հնչել»։
