Երեկ Fox News հեռուստաընկերությանը տված հարցազրույցում ԱՄՆ նախորդ նախագահական ընտրությունների ժամանակ Բարաք Օբամայի հիմնական մրցակից, սենատոր Ջոն Մաքքեյն ասել է, որ Լիբիայի առաջնորդի տապալումից հետո հաջորդը լինելու է Սիրիայի նախագահ Բաշար Ալ-Ասադը: Նա զգուշանալու կոչ է արել նաև Ռուսաստանի, Չինաստանի և Իսրայելի իշխանություններին:
«Բաշար Ալ-Ասադը կլինի հաջորդը: Այնպիսի երկրներ, ինչպիսիք են Չինաստանը, Ռուսաստանը և Իսրայելը նույնպես անհանգիստ են»,- ասել է նա: ««Արաբական գարնան» արձագանքները կլսեն ամբողջ աշխարհում` Ռուսաստանից մինչև Չինաստան և Իսրայել: Այն ժամանակվանից, երբ մի երիտասարդ ինքնահրկիզվեց, սկիզբ դնելով թունիսյան հուզումներին, մենք տեսնում ենք սրընթաց փոփոխվող աշխարհ»,- ասել է սենատորը:
Մաքքեյնը հավելել է, որ ինքը մեծ գոհունակությամբ է ընդունել այն փաստը, որ ՆԱՏՕ-ն ներգրավվել է Լիբիայի ներքին զարգացումներին: Սակայն սենատորին հուզել է այն փաստը, որ պատերազմը տևեց ավելի քան 6 ամիս: «Այս հակամարտությունն այսքան արագ չպետք է շարունակվեր: Եթե ԱՄՆ-ն ավելի ակտիվ լիներ օդային ռմբակոծությունների ժամանակ, ամեն ինչ ավելի արագ ավարտ կունենար: Սակայն մենք նախընտրեցինք չանել դա` ամեն ինչ ղեկավարելով կողքից»,- ասել է Մաքքեյնը:
