Երեկ ՄԱԿ-ում շարունակվել են քննարկումներ Սիրիայի հարցի շուրջ: Արևմուտքը շարունակում է պնդել, որ անհրաժեշտություն կա ՄԱԿ-ի անվտանգության խորհրդում քննարկել և ընդունել Սիրիայի իշխանությունների գործողությունները դատապարտող բանաձև: Սակայն Ռուսաստանը նման բանաձևի ընդունմանը դեմ է հանդես գալիս:
Այդ կազմակերպությունում ՄԱԿ-ի մշտական ներկայացուցիչ Վիտալի Չուրկինը հայտարարել է, որ Դամասկոսի նկատմամբ պատժամիջոցների կիրառման անհրաժեշտություն չի տեսնում: Պատասխանելով լրագրողների այն հարցին, թե արդյոք ժամանակը չէ՞ Դամասկոսի նկատմամբ պատժամիջոցների կիրառման համար, նա ասել է. «Ո՛չ, մենք այդպես չենք կարծում»: Այս մասին հաղորդում է ITAR-TASS գործակալությունը:
Ռուսաստանը մեկ անգամ չէ, որ սպառնացել է վետո կիրառել Սիրիայի հարցով բանաձևի ընդունման ժամանակ: Այդուհանդերձ, մի քանի շաբաթ առաջ ՄԱԿ-ի ԱԽ-ին հաջողվել էր հայտարարություն ընդունել, որտեղ Սիրիայում հակամարտող կողմերին կոչ էր արվում զերծ մնալ բռնություններից և սկսել քաղաքական քննարկումներ:
Առաջարկվող բանաձևով նախատեսվում է կազմել «սև ցուցակ», ուր տեղ կգտնեն մի շարք սիրիական ընկերություններ, ինչպես նաև կոչ կարվի Հաագայում միջազգային քրեական դատարանին` Սիրիայի նախագահ Բաշար Ալ-Ասադին ձերբակալելու որոշում կայացնել: