Freedom House միջազգային, ոչ կառավարական կազմակերպությունը մեղադրել է Ռուսաստանի նախկին նախագահ, ներկայումս վարչապետ Վլադիմիր Պուտինին հարևան հետխորհրդային երկրներում ժողովրդավարության զարգացման համար խնդիրներ առաջացնելու մեջ:
Ռուսաստանի գիտությունների ակադեմիայի Համաշխարհային տնտեսության և արտաքին հարաբերությունների ինստիտուտի առաջատար մասնագետ Ալեքսանդր Կռիլովը «Առաջին լրատվականի» հետ զրույցում նկատեց, որ շատ հնարավոր է նման քննադատության պատճառն այն է, որ Ռուսաստանում սպասվելիք նախագահական ընտրություններում Պուտինը համարվում է հիմնական թեկնածուն. «Արևմուտքի համար Պուտինը պակաս ցանկալի թեկնածու է, քան լիբերալ Մեդվեդևը, չնայած վերջինս ևս քննադատության է արժանանում»:
Սակայն, ըստ փորձագետի, Freedom House-ի նման զեկույցի համար ևս մեկ պատճառ կա, որը, Կռիլովի գնահատմամբ, առավել հավանական է:
Կռիլովի խոսքերով, բոլորը ցանկանում են կատարվող իրադարձություններում մեղադրել ուրիշներին և խուսափել սեփական պատասխանատվությունից. «Հարավային Կովկասում Արևմուտքի վարած քաղաքականությունը ևս ոչ միշտ է իդեալական եղել և նման կերպ` մեղքը բարդելով Ռուսաստանի վրա Արևմուտքը իր գործողությունների համար պատասխանատվությունը գցում է իր ուսերից»:
Կռիլովը նկատեց նաև, որ նման վարվելակերպը բնորոշ է նաև Հարավային Կովկասի երկրներին, մասնավորապես Հայաստանին, Ադրբեջանին և հատկապես Վրաստանին. «Այս երկրներում սեփական խնդիրների պատճառը տեսնում են Ռուսաստանի մեջ և բացարձակապես հրաժարվում են ստանձնել այն պատմական պատասխանատվությունը, որ արդեն 20 տարի է անկախ են համարվում»:
