Ռուս-ուկրաինական պատերազմի պատճառով ռուսական ռուբլին շարունակում է արժեզրկվել։ Հայաստանյան բանկերում առքն այսօր արդեն 3-4 դրամի միջակայքում է, նախկին 7-ի փոխարեն։ Շատ արտահանողներ կասեցրել են արտահանումը ռուբլու արժեզրկման պատճառով: Արդեն իսկ հնչում են կարծիքներ, որ ՌԴ-ից տրանսֆերտների հոսքը զգալի կպակասի, ինչը ծանր հետևանքներ կունենա Հայաստանի տնտեսության վրա:
Տնտեսագետ Մովսես Արիստակեսյանը «Առաջին լրատվական»-ի հետ զրույցում նշեց, որ սա առաջին հերթին հարված է արտագնա աշխատողներին, որոնք աշխատում են թե Ռուսաստանում, թե Ուկրաինայում: Նրա խոսքով՝ մարդիկ, որոնք գնացել են աշխատելու և ընտանիք պահելու խնդիր ունեն, տուժում են: Բացի այդ, Ռուսաստանն արգելք է դրել երկրից 10.000 դոլարից ավելի արտարժույթ հանելու վրա։ Այսինքն, ըստ տնտեսագետի, մարդիկ իրենց վաստակածն իրացնելու և իրենց հարազատներին և ընտանիքներին ուղարկելու խնդիր ունեն: Ավելին, իրենք տուժում են նաև ռուբլու անկման պատճառով: Արիստակեսյանը նշեց, որ ուկրաինական ազգային դրամն էլ է անկում ապրում. մարդիկ, որոնք աշխատում էին, բնականաբար վնասներ են կրում նաև գնաճի պատճառով: Տնտեսագետի խոսքով՝ տրանսֆերտները կտրուկ կկրճատվեն, ինչը մեր բյուջեի լրացուցիչ մասն է:
«Այս ամենը կազդի նաև ապրանքաշրջանառության վրա, արտադրողների, ներմուծողների և արտահանողների վրա: Կկրճատվեն որոշակի առումով արտահանումները, մեր արտադրողները իրենց արտադրանքը իրացնելու խնդիրներ կունենան, և նույնկերպ կարող է ազդել ներմուծման ապրանքների գների վրա, հիմնականում պարենային ապրանքների շրջանակներում, որոնց մեծ մասը ներկրում ենք Ռուսաստանից: Այդպիսի ծանր իրավիճակ է այսօր»,-ասաց Արիստակեսյանը:
Նա հիշեցրեց, որ կառավարության վերջին նիստին վարչապետը ևս նշեց, որ մեզ մոտ լուրջ գնաճ է լինելու. «Մենք չենք կարող ասել, որ այս թվային փոփոխություններն, ըստ էության, մեծացրել են մեր քաղաքացիների բարեկեցությունը, որովհետև, ցավոք սրտի, 2021-ի ընթացքում ունեցել ենք էական գնաճ, որը 2021-ի դեկտեմբերին 2020 թ.-ի դեկտեմբերի համեմատ կազմում է 7,7 %, իսկ սա ավելին է, քան նախատեսել էինք պետական բյուջով։
Գնաճը, ցավոք սրտի, գլոբալ պրոբլեմ է։ Փորձում ենք միջոցներ ձեռնարկել այն զսպելու համար և հույս ունենք, որ այս տարի մեզ կհաջողվի գնաճը բերել պլանավորված միջակայքի, և եթե զուգահեռ հաջողվի արձանագրել մեր նշաձողը՝ 7 տոկոս տնտեսական աճը, հույս ունենք, որ արդեն բարեկեցության աճի ռեժիմի մեջ մտնելու հնարավորություն կունենանք»,-ընդգծեց տնտեսագետը:
Արիստակեսյանի խոսքով՝ կառավարությունը պարտավոր է կատարել ՀՀ օրենքը, որը ընդունվել է 2004-ին և այնտեղ կա նորմ ՝ գնաճի պայմաններում եռամսյակը մեկ պետք է կատարվի թոշակների, աշխատավարձերի և նպաստների ինդեքսիացիա. «Ցավոք, երբևէ այդ նորմը չի իրականացվում մեր երկրում: Հետևաբար, ժողովրդի մեջ էլ ավելի կխորանա աղքատությունը, սոցիալական լուրջ ճնշում կլինի բնակչության վրա: Հատկապես կենսապահովման նվազագույն զամբյուղով աշխատողների շրջանում»:
Հարցին, թե որքանով է հավանական, որ ռուսական տնտեսություն դեֆոլտի առաջ կկանգնի, նա պատասխանեց. «Կարծում եմ, արևմտյան երկրների իրականացրած շարունակվող պատժամիջոցների արդյունքում դեֆոլտի հեռանկարը սպառնում է ռուսական տնտեսությանը, իսկ ռուսական տնտեսության դեֆոլտը շղթայական կերպով ազդելու է նաև մեր տնտեսության վրա, որի ապրանքաշրջանառության 30 տոկոսը կատարվում է Ռուսաստանի հետ: Բնականաբար, ծանր ժամանակներ են սպասվում, մենք շարունակական հարվածների մեջ ենք՝ գումարած մեր 44-օրյա պատերազմի ծանր հետևանքները»,-ընդգծեց տնտեսագետը:
