Միավորված ազգերի կազմակերպությանը Հայաստանի անդամակցության և Հայաստանի Հանրապետության դիվանագիտական ծառայության 30-ամյակին նվիրված միջոցառմանը ՀՀ վարչապետ Նիկոլ Փաշինյանը հանդես է եկել ծավալուն ելույթով։
Ի թիվս այլ հարցերի վարչապետ Փաշինյանն անդրադարձել է իր կողմից ավելի վաղ հայտարարված խաղաղության դարաշրջանին և նշել, որ ՀՀ կառավարության օրակարգում է Ադրբեջանի հետ խաղաղության պայմանագրի բանակցությունների մեկնարկի հարցը․«Կառավարությունն առաջնորդվում է այն տրամաբանությամբ, որ անվտանգության ապահովման ամենագործուն երաշխիքը խաղաղությունն է: Այս է պատճառը, որ մեր երկրի և տարածաշրջանի համար խաղաղ զարգացման դարաշրջան բացելը որդեգրվել է որպես պետական ռազմավարություն: Ռազմավարության կարևորագույն նպատակը Հայաստանի շուրջ տարածաշրջանային և միջազգային հնարավորինս բարենպաստ մթնոլորտի և միջավայրի ձևավորումն է»,-մասնավորապես հայտարարել է ՀՀ կառավարության ղեկավարը։
Հասարակական-քաղաքական գործիչ Նարինե Դիլբարյանը համոզմունք հայտնեց, որ խաղաղության անհրաժեշտությանը ոչ ոք չի կասկածում․ «Սակայն նաև գոյություն ունի առողջ տրամաբանություն և իրադարձություններ, որոնց ընթացքը կամ երաշխավորում է ու դարձնում այդ խաղաղությունն իրատեսական կա՛մ պարզապես այդ խաղաղությունը դարձնում ցնորական։ Այս իրավիճակում Նիկոլ Փաշինյանի առաջարկած օրակարգը իրականում ցնորական է և իմ համոզմամբ բխում է նաև ինչ-որ որոշումներ կայացնելու անունակությունից և ըստ էության կառավարման գործիքների վատ տիրապետելու կամքից։ Այս իրավիճակում, երբ պատերազմական պտույտները գնալով արագանում են և ամբողջ աշխարհը ուժի միջոցով է փորձում պարտադրել խաղաղության իր պատկերացումը, մեր թշնամին, որը ՆԱՏՕ-անդամ Թուրքիայի ուղղակի հովանավորությամբ իր ռազմական ու ռազմաարդյունաբերական ներուժը զարգացնում է և միայն թեթևակի խոսում խաղաղության մասին՝ ի վնաս մեզ տեսակետից, մենք այդ պետությանը հակադրում ենք ռազմաարդյունաբերական համալիրի բացարձակ անգործունակություն, բանակային բարեփոխումների տեսլականներ, որոնք իրական փաստաթղթերով ու գործուն քայլերով չեն զուգակցվում։ Եվ ամենակարևորը՝ հարվածի տակ գտնվող սահմանների բարեփոխման, արդիականացման զրոյական ծրագիր»,-«Առաջին լրատվական»-ի հետ զրույցում ասաց նա։
Ըստ Դիլբարյանի՝ այսպիսի դիրքորոշումների մեջտեղում խաղաղություն լինել չի կարող․ «Այսինքն՝ եթե ուժերից մեկը, տվյալ դեպքում Ադրբեջանը ավելացնում է իր ռազմական ուժը և բացի դրանից՝ ուղղակի ահաբեկչության ենթարկում Արցախի պահպանված հատվածում, ՀՀ ինքնիշխան տարածքում մեր քաղաքացիներին՝ դրան հակադրել մեր կողմից խաղաղության բարի ծրագիր, դա նշանակում է պարզապես չկարողանալ կառավարել ու բարի բառերով թաքցնել սեփական անկարողունակությունը»,-եզրափակեց նա։
Քաղաքական գործիչ Պետրոս Մակեյանը գտնում է, որ խաղաղության օրակարգն այսօր Նիկոլ Փաշինյանից ու մեր իշխանություններից կախված չէ․ «Դա հիմնականում կախված է մեր հարևան պետություններից, որոնցից երկուսը թշնամական են տրամադրված և այսպես ասած տարածաշրջանը սպասարկող կամ իր հովանու տակ վերցրած Ռուսաստանից։ Հիմա ինքն անընդհատ նույն բանը կրկնում է, բայց աշխարհը հիմար չէ, բոլորն էլ հասկանում են՝ ումից ինչ սպասել։ Գաղափարը լավն է, բայց ի՞նչ գնով, մեզնից ի՞նչ է կախված։ Հիմա ասում են՝ Զանգեզուրի միջանցքը տվեք, խաղաղություն կլինի։ Վաղն էլ կասեն՝ Սյունիքը տվեք, խաղաղություն կլինի։ Բայց դա մեզ ու՞ր կհասցնի»,-«Առաջին լրատվական»-ի հետ զրույցում ասաց նա։
Մակեյանի խոսքերով՝ այս պահին խաղաղության օրակարգը ոչ միայն իրատեսական չէ, այլ նաև վտանգավոր․ «Որովհետև եթե խաղաղությունը գնում է ի հաշիվ զիջումների, դա խաղաղություն չէ, կապիտուլյացիոն գործընթացի շարունակություն է»,-եզրափակեց նա։
