Թուրքիայի օգտակար հանածոների հետազոտման և հետախուզման գլխավոր վարչության կողմից իրականացված ուսումնասիրությունների ընթացքում Խարբերդում հայտնաբերվել են հանրապետության պատմության մեջ օգտակար հանածոների ամենամեծ պաշարները, որի շուկայական արժեքը միլիարդավոր դոլարներ է կազմում։ Այդ շրջանը հարուստ է նաև պղնձի, ոսկու, ցինկի, կոբալտի պաշարներով։
Աղբյուրի հաղորդմամբ՝ քեմալական շարժման տարիներին Խարբերդի օգտակար հանածոները «օգտակար» են եղել նաև փամփուշտի պատրաստման գործում, գրում է ermenihaber-ը։
Սաղըրլը գյուղի բնակիչներից Ռամազան Սեքմենը հույս է հայտնել, որ հայտնաբերված պաշարները կնպաստեն Թուրքիայի արտաքին պարտքը մարելուն։ Նրա պնդմամբ՝ հանքավայրի պաշարները մոտավորապես 20-30 մլրդ դոլար են կազմում։
Հետաքրքիր է, որ 100 տարի այդ պաշարները, որոնց մասին հայտնի էր, չեն օգտագործվել։ Հնարավոր է, դա կապված էր Լոզանի պայմանագրով հայերի սեփականության հանդեպ սահմանափակումների հետ։
Ի՞նչն է ստիպել Թուրքիային «հիշել» հայկական Խարբերդի պաշարների մասին։
Թուրքիայի ընդդիմադիր «Լավ» կուսակցության նախագահ Մերալ Աքշեները քննադատել է իշխանությունների քաղաքականությունն Ուկրաինայի հարցով։
«ԵԽ-ում ՌԴ անդամակցությունն առկախելու քվեարկության ժամանակ, որտեղ միայն Հայաստանն էր աջակցել ՌԴ-ին, Թուրքիան ձեռնպահ է քվեարկում», ասել է նա։ «Ստիպված ենք ասել, որ սա ակնհայտ բռնազավթման և հարձակման նախաձեռնություն է, քանի որ ՌԴ նախագահ Պուտինը չի ճանաչում Ուկրաինայի ժողովրդի կամքը, չի հարգում քաղաքական ինքնիշխանությունը։ Երբ Ռուսաստանի այս մոտեցումն ակնհայտ է, ո՞վ կարող է պնդել, որ Թուրքիայի համար նա անվտանգ է։ Ո՞վ կարող է հանգիստ ասել, որ Պուտինի գլխում Կարսը, Էրզրումը և Արդահանը Ռուսաստանի պակասող մասերը չեն», ասել է Աքշեները։
