Ադրբեջանական 1news.az-ին տված հարցազրույցի ժամանակ էներգետիկ ու ԱՊՀ երկրների գծով գերմանացի փորձագետ Ալեքսանդր Ռարն անդրադարձել է հայ-թուրքական հարաբերությունների կարգավորմանը.
«Թուրքիան մի կողմից դեռ շարունակում է մնալ Ադրբեջանի դաշնակիցը, սակայն մյուս կողմից էլ ինքնուրույնաբար զարգացնում է սևծովյան տարածաշրջանում իր աշխարհաքաղաքականությունը։ Թուրքիան իր ազգային շահերը չի կողմնորոշի բացառապես Լեռնային Ղարաբաղի հիմնախնդրի ուղղությամբ. Թուրքիան կառաջնորդվի՝ ելնելով սեփական շահերից։
Թուրքիան Հայաստանի հետ ունի իր խնդիրները, որոնք նույնպես լուծված չեն։ Դա մասնավորապես վերաբերում է Հայոց ցեղասպանության ճանաչմանը։ Հայաստանը պահանջում է, որ Թուրքիան ճանաչի այն, սակայն թուրքերը չեն ցանկանում գնալ այդ քայլին, քանի որ այդ դեպքում նրանք ստիպված կլինեն փոխհատուցում վճարել, իսկ հետո հայերը կսկսեն բարձրացնել նաև տարածքային հավակնությունների հարցը։
Հարավային Կովկասի բոլոր հակամարտությունները բավական սուր են՝ ի տարբերություն եվրոպականների, որոնց հաջողվել է բանակցությունների ու փոխզիջումների միջոցով լուծել Երկրորդ համաշխարհային պատերազմից հետո։ Հարավային Կովկասի հակամարտությունները բարդ են։
Այստեղ դիվանագիտական փոխզիջումն ուղեկցվում է դիրքերի հանձնմամբ, պարտությամբ, ինչի համար էլ կողմերից ոչ ոք չի գնում փոխզիջման։ Շատ բարդ է զբաղվել այնպիսի դիվանագիտությամբ, ուր հնարավոր է միայն մեկ հաղթող և մեկ պարտվող։ Այստեղ արտաքին ուժերը շատ քիչ բան կարող են անել»։
