Քաղաքագետ Ռուբեն Մեհրաբյանը կարծում է, որ տեղի է ունենում 1945, 1975, 1991 թվականին տեղի ունեցած իրադարձությունների հիմքով ձևավորված աշխարհակարգի փլուզում․«Եվ այդ փլուզումն իրականացում է Պուտինը՝ այս պատերազմին տեղացող կրակոցներով։ Ռուս-ուկրաինական դիվանագիտական հարաբերությունները խզումը պարզապես հարակից իրադարձություններից մեկն է, որը որքան էլ չափազանց ուշագրավ է, այնուամենայնիվ որոշիչը դա չէ։ Որոշիչն այն է, որ փլուզվող աշխարհակարգի պայմաններում մենք բոլորս ենք այլևս ուղիղ սպառնալիքի տակ, ընդ որում՝ այդ սպառնալիքները գոյաբանական մակարդակի են»,-«Առաջին լրատվական»-ի հետ զրույցում ասաց նա։
Մեհրաբյանը կարծում է, որ վարչապետ Նիկոլ Փաշինյանի Ղազախստան կատարած այցը պլանավորված չէր և պայմանավորված է այն պատերազմական գործողություններով, որը սանձազերծել է Ռուսաստանն ընդդեմ Ուկրաինայի․ «Ռուսաստանը փորձում է իր շուրջը կոնսոլիդացնել ևս մի քանի երկիր, որպեսզի ցույց տա իր ներքին լսարանին, որ մեկուսացված չէ։ Սա նշանակում է, որ Հայաստանը հայտնվելու է բավականին ծանր ճնշումների ներքո, բայց դա ոչինչ չի նշանակում։ Հայաստանը պետք է պահպանի իր պոզիտիվ չեզոքություն այս կոնֆլիկտում, որովհետև չունի որևէ շահ բացասական դիրքորոշում ունենալու Ուկրաինայի նկատմամբ։ Մանավանդ չունի որևէ շահ միջազգային իրավունքի այս զարհուրելի խախտման ֆոնին իրեն դնի միջազգային նորմերից դուրս։ Այն դիրքորոշումը, որը մենք տեսանք արտգործնախարարության տարածած հայտարարության մեջ՝ պետք է պահպանվի մինչև վերջ, ընդհուպ կյանքի գնով պահպանելու տարբերակով։ Սա մեր դիվանագիտության առաջ դրված կատեգորիկ հրամայական է»,-ընդգծեց նա։
Հարցազրույցն ամբողջությամբ՝ տեսանյութում