«Առաջին լրատվական»-ի հարցերին պատասխանել է Ստամբուլում լույս տեսնող «Ակոս» հայկական շաբաթաթերթի հայերեն բաժնի խմբագիր Բագրատ Էստուկյանը
Պարոն Էստուկյան, Նոր տարվա նախօրեին Թուրքիայի դատախազությունը խորհրդարան է ներկայացրել մի ծավալուն ռեզյումե, որով միջնորդում է 28 ընդդիմադիր պատգամավորներին, այդ թվում Կարո Փայլանին, զրկել պատգամավորական անձեռնմխելիությունից։ «Հանցագործությունների» ցանկում նաև Հայոց ցեղասպանությունը դատապարտելու մասին ընդդիմադիրների կոչերն են։ Նշվում է, որ Էրդողանին խիստ վրդովեցրել է այն, որ ապրիլի 25-ին Կարո Փայլանը մեջլիս է ներկայացրել Հայոց ցեղասպանության ճանաչման մասին օրինագիծը: Ի՞նչ վտանգներ եք տեսնում, որքանով են նրանք հայամետ դիրքորոշում ունեցող պատգամավորներ:
Նրանց մեծամասնությունը Ժողովուրդների դեմոկրատական կուսակցության պատգամավորներ են, իսկ այդ կուսակցությունը հայամետ է: Դա այն կուսակցությունն է, որին անդամակցում է նաև Կարո Փայլանը: Այդ 28- անուններում իր անունն էլ կա: Սա նորություն չէ, այլ շարունակվող գործընթաց: Հիմա ուզում են նրանց պատգամավորական անձեռնմխելիությունից զրկել: Այդ վտանգը կա և ընտրություններին ընդառաջ նման քայլերի սպասում էինք: Տեսնենք՝ ինչ զարգացումներ կլինեն, անցյալում նման բաներ գործադրվեցին և բազմաթիվ պատգամավորների անձեռնմխելիությունից զրկեցին:
Ըստ էության, ոչ միայն Կարո Փայլանը, այլ նաև մյուս պատգամավորները հայամետ դիրքորոշում ունե՞ն:
Այդ կուսակցությունն ընդհանրապես այդ դիրքորոշումն ունի, Ցեղասպանությունը ճանաչող, ամեն տարի հիշատակող կուսակցություն է, ոչ միայն Կարո Փայլանը, այլ ամբողջ կուսակցությունը:
Հնարավո՞ր է՝ Էրդողանի այս դիմումը բավարարվի: Ի՞նչ է սպառնում այդ պատգամավորներին:
Այո, հավանական է, եթե այն խորհրդարանի օրակարգում ընդգրկված է, պատգամավորների մեծամասնությամբ իրենք կարող են դա անել: Իշխող կուսակցությունը և նրա հետ համագործակցող կուսակցությունը միասին խորհրդարանում բավարար ձայներ ունեն այդ որոշումն անցկացնելու համար:
Սա որոշակի դժգոհություն չի առաջացնո՞ւմ հանրության շրջանում:
Այդ կուսակցության անդամների նկատմամբ դատեր են բացվել Ցեղասպանությունը պաշտոնապես ճանաչած լինելու համար: Թուրքիայի պատժական օրենքի տխրահռչակ 301-րդ հոդվածի գծով արդեն մեղադրանքներ են հարուցված:
Այսինքն այդ պատգամավորներին կարող են անգամ ազատազրկե՞լ:
Մենք այս պահին ոչինչ ասել կամ անել չենք կարող, պետք է սպասենք դեպքերի զարգացմանը: Անշուշտ նրանք պետք է աղմկեն, մերժեն մեղադրանքը, բայց թե արդյունքի վրա դա ինչ ազդեցություն կունենա, կարծում եմ՝ ոչ մի: Մինչև այսօր բազմաթիվ ընտրված քաղաքապետներ պաշտոնանկ են արվել ապօրինի կերպով: Այսօր Թուրքիայի դատական համակարգն ամբողջությամբ քաղաքականացված է, դատարաններն Էրդողանի կառավարության հսկողության տակ են, հետևաբար որևէ այլ ձևով արդարության հասնել հնարավոր չէ:
Ինչպե՞ս եք գնահատում, որ առաջիկայում տեղի է ունենալու Հայաստանի և Թուրքիայի բանագնացների առաջին հանդիպումը:
Ես կարծում եմ՝ Մոսկվայում նախատեսված այդ հանդիպումը դրական հետևանքներ կունենա, որովհետև նրանք պետք է հարաբերությունների կարգավորման ճանապարհային քարտեզը պատրաստեն: Սա իրենց առաջին հանդիպումն է լինելու և կարծում եմ՝ հետզհետե արդյունքները պետք է տեսնենք:
Այսինքն ավելի շատ դրական են սպասումներն այդ հանդիպումից:
Այո, իհարկե, դրական են:
