Սահմանին պատերազմական գործողություններ են ընթանում, սակայն «Հայաստան» դաշինքը հայտարարում է, որ Նիկոլ Փաշինյանի իշխանությունը բերել և բերում է զոհեր, տարածքային կորուստներ, պառակտում, քաոս:
«Իրավիճակի ամբողջական հանգուցալուծումն այս իշխանությունների հեռանալն է: Նիկոլ Փաշինյանի հրաժարականին պետք է հաջորդի բոլոր կարող ուժերի համախմբմամբ՝ նոր կառավարության ձևավորումը և արտաքին ու ներքին խնդիրների լուծման քաղաքականության ապահովումը»,-նշված է դաշինքի հայտարարության մեջ:
Քրիստոնեա-ժողովրդավարական կուսակցության ղեկավար Լևոն Շիրինյանն «Առաջին լրատվական»-ի հետ զրույցում նշեց, որ «Հայաստան» դաշինքն ընդդիմություն չէ, ռևանշիզմ է։ «Հայաստանում իշխանության փոփոխությունը որոշվում և որոշվել է հայ ժողովրդի քվեով, և իրենք չկան սրա մեջ, իրենք խորհրդարանում մարգինալ հատված են, չունեն որևէ անելիք, նրանց կողմից որևէ առաջարկ գոյություն չունի և ոչ էլ միտք կա։
Իրական ընդդիմությունն այսօր արտախորհրդարանական ուժերի տեսքով է, վարչապետի հետ համատեղ քննարկում է երկրի կարևորագույն հարցերը, հայտնում է տեսակետներ, թե որտեղ է համաձայն և որտեղ համաձայն չէ և պետության հետ է, մնացածը խորհրդարանում ապակայունացնող գործոններ են»,-ասաց Շիրինյանը:
Նա հավելեց, որ այդ ուժերին խորհուրդ պետք է տալ գնալ գիրք կարդալ. «Հերիք է, բավական է, սա աշխարհաքաղաքական կարևորագույն տեղաշարժ է համաշխարհային քաղաքականության մեջ, որտեղ երկու գիշատիչ ոխերիմ բարեկամներ իրար հետ խնամիություն են անում՝ Ռուսաստանը և Թուրքիան: Եվ պարզ է, որ Ռուսաստանը հերթական անգամ Հայաստանին փորձում է օգտագործել Թուրքիայի հետ առևտրի մեջ։ Եվ եթե այսքան բան չեն հասկանում, թող գնան իրենց գողացածը վայելեն և թողնեն մեզ հանգիստ, մենք այս վիճակը հաղթահարենք, մեր ժողովրդի համար կարևորագույն օրեր են։
Ւսկ նրանց նպատակը երկրում առկա վիճակը ապակայունացնելն է իշխանության գալու համար, որպեսզի լավ գործիք լինեն ուրիշ մայրաքաղաքների համար, չեն կարող այլ ֆունկցիա կատարել այս ծանրագույն օրերին»,-ընդգծեց Շիրինյանը:
Հարցին, թե արդյոք իմաստ ունի ՀԱՊԿ-ից որեւէ աջակցություն սպասել, նա պատասխանեց. «Հայաստանն ուղեցույց պետք է ունենա ՀԱՊԿ-ից դուրս գալու համար և հարաբերությունները բացառապես Ռուսաստանի հետ կառուցի, այդ արտաքին շղարշի կարիքը չունենք, որպեսզի խաբկանք չառաջանա»:
Ինչ վերաբերում է ՄԱԿ-ի Անվտանգության խորհուրդ դիմելուն, Լևոն Շիրինյանն ասաց, որ բոլոր հնարավոր օղակներով պետք է աշխատել. «Եթե պետականությունը վտանգված է, ժողովրդի կյանքը ևս վտանգված է, բայց սա չի նշանակում, որ մենք պետք է ոչնչանանք հերթական անգամ ուրիշի համար մայր բոլշևիկի ղեկավարությամբ: Չի լինելու նման բան: Մենք գործող իշխանության կողքին ենք, վստահ եմ՝ արտախորհրդարանական շատ ուժեր ևս»:
