Երևանի պետական համալսարանը «Ձեռնարկությունների ինկուբատոր» հիմնադրամի (ՁԻՀ), ISTC-ի հետ համատեղ և PMI Science-ի աջակցությամբ անցկացրեցին «Տվյալների գիտությունը բիզնեսում» մագիստրոսական կրթական ծրագրի կրթաթոշակների տրամադրման արարողությունը: Կրթական ծրագիրը մշակված է ԱՄՆ-ի Սան Խոսեի պետական համալսարանի և գործընկեր ընկերությունների հետ համատեղ:
ԵՊՀ ռեկտորի ժամանակավոր պաշտոնակատար Հովհաննես Հովհաննիսյանը, կարևորելով մագիստրոսական կրթական ծրագիրը, նշում է՝ այսօր տվյալագետների պակաս զգացվում է ամբողջ աշխարհում: Նրա խոսքով՝ եթե բիզնեսը չգա դեպի կրթություն, ապա դժվար է ակնկալել լավ կրթություն, այսպիսի համագործակցություն պետք է կիրառել բոլոր ոլորտներում։
Հատկանշական է, որ ուսանողները հնարավորություն ունեն նաև 2-րդ կուրսից շարունակելու ուսումը ԱՄՆ-ի Սան Խոսեի պետական համալսարանում՝ ստանալով կրկնակի դիպլոմ և անցնելով պրակտիկա Սիլիկոնյան հովտի կազմակերպություններում։ Այս տարի երեք ուսանող շարունակելու է ուսումը Սան Խոսեի պետական համալսարանում։
«Տվյալների գիտությունը բիզնեսում» մագիստրոսական կրթական ծրագրի ղեկավար Ռուբեն Գևորգյանը իր հերթին նկատում է՝ կատարվել է հսկայական աշխատանք այսպիսի արդյունք գրանցելու համար:
Ծրագրի 2021-2022թթ․ ուսումնական տարվա ընդունելությունը կազմակերպվել է երկու փուլով․ 1-ին փուլի փաստաթղթերն ընդունվում էին 2021թ-ի հունիսի 1-ից հուլիսի 1-ը ներառյալ, իսկ 2-րդ փուլինը՝ ընթացիկ տարվա հուլիսի 12-ից օգոստոսի 20-ը ներառյալ:
PMI Science գիտահետազոտական կենտրոնի գործադիր կառավարիչ Վահե Դանիելյանը նշեց, որ ծրագրին արդեն չորրորդ տարին է կյանքի կոչվում, լավագույն արդյունքն այն է, որ մագիստրոսական ծրագրում ընդունված ցանկացած ուսանող անգամ առաջին տարում ունի աշխատատեղ:
Մագիստրոսական այս ծրագրի մեկնարկից ի վեր ֆինանսավորում է տրամադրվել 63 ուսանողների։
