Կարմիր խաչի միջազգային կոմիտեի ներկայացուցիչներն այցելել են Ադրբեջանում գտնվող գերեվարված եւ պատանդառված հայերին, ծանոթացել նրանց պահման պայմաններին, օգնել կապ հաստատել իրենց ընտանիքների անդամների հետ: «Լուրեր»-ին հայտնել է Հայաստանում Կարմիր խաչի գրասենյակի ներկայացուցիչ Զառա Ամատունին։ Նա ասել է, որ կոմիտեի ներկայացուցիչները պարբերաբար տեսակցում են բոլոր այն անձանց, որոնց գերության փաստը պաշտոնապես հաստատված է: Բաքուն այս պահին հաստատում է 40 անձի՝ Ադրբեջանում գտնվելու հանգամանքը:
«Անձանց հնարավորություն է տրվել փոխանակվել ընտանեկան բնույթի տեղեկություններով, լուրերով, օգտագործվել են Կարմիր խաչի նամակներ, տեսաուղերձներ եւ հեռախոսազանգեր: Մենք չենք կարող հրապարակել այն մարդկանց թիվը, որոնց մենք տեսակցում ենք, բայց կարող եմ հաստատել, որ գերեվարման ողջ ընթացքում յուրաքանչյուր ընտանիքի հետ կապի մեջ ենք»,- հայտնել է Ամատունին:
