Թաթարստանի խորհրդարանը միաձայն մերժել է ՌԴ օրենքի նախագիծը, ըստ որի դաշնային ինքնավար սուբյեկտներում վերացվում է նախագահի պաշտոնը:
Ավելորդ է թերևս ասել, որ օրենքի նախագիծը չէր հայտնվի շրջանառության մեջ, եթե այն չվայելեր հավանություն ամենաբարձր ատյանում՝ Կրեմլում:
Հետևաբար, ստացվում է, որ Թաթարստանի խորհրդարանը միաձայն մերժել է Կրեմլին: Ինչպիսին կլինի Ռուսաստանի մյուս սուբյեկտներում այդ օրինագծի հանդեպ վերաբերմունքը, բավականին բարդ է ասել, սակայն Թաթարստանի խորհրդարանի դիրքորոշումն այլ կերպ, քան ըմբոստություն կամ այսպես ասած թավշյա, լատենտ ապստամբություն անվանելը դժվար է: Առավել ևս ամիսներ առաջ տեղի ունեցած մի իրողության ֆոնին, երբ Թաթարստանի ինքնավար հանրապետության նախագահը այցելել էր Անկարա և այնտեղ նրան ընդունելության արժանացրին ընդհուպ Էրդողանի մակարդակով, և գրեթե միջպետական արարողակարգով:
Հարկ է նշել նաև, որ Թուրքիան ներկայումս ահռելի ներկայություն ունի հենց Թաթարստանում: Իհարկե դժվար է ասել, որ թաթարների որոշումը՝ փաստորեն մերժել Պուտինին, կունենա Ռուսաստանում դոմինոյի էֆեկտ: Սակայն, առնվազն հոգեբանական ռումբի էֆեկտ այն թերևս գործում է, կամ հենց դրսևորվել է որպես այդպիսին: Ընդ որում, սա լրջագույն ազդակ է նաև Հայաստանի համար, չնայած այն հանգամանքին, որ թվում է, թե այսպես ասած ներռուսական հարաբերության հարց է և բավականին հեռու Հայաստանից: Հայաստանին ինչ՝ Թաթարստանը կունենա նախագահ, թե ոչ, թվում է թե: Բայց, ամբողջ խնդիրն այն է, որ առկա իրադարձությունը վկայում է Ռուսաստանում Թաթարստանի քաղաքական ահռելի ազդեցության մասին: Իսկ հաշվի առնելով այդ ինքնավար հանրապետության հետ կապված թուրքական գործոնը, հնարավոր է գնահատել իրողության մասշտաբն ու դրա հնարավոր ազդեցությունը ռուսական քաղաքականության լայն արեալում, որի շրջանակում են նաև Կովկասը և Հայաստանը:
Անշուշտ, ոչինչ բացարձակացնել պետք չէ, սակայն դիտարկել զարգացումներն ու դրանց շերտերը՝ հրամայական է, արթուն լինելու համար, երբ Ռուսաստանում կայացվեն պարզապես թյուրքական որոշումներ: Այդ ժամանակը կարող է և չգալ, ի վերջո Թաթարստանի խորհրդարանի քվեարկությունից ռուսական պետականության ապոկալիպսիս կառուցելը հազիվ թե լինի սթափության նշան: Բայց, մեղմ ասած անսթափ և ծայրաստիճան վտանգավոր կլինի այդուհանդերձ զարգացումների այդպիսի տրամաբանությանը որևէ կերպ պատրաստ չլինելն ու մշակած անելիք կամ քայլեր չունենալը:
