Inosmi-ի փոխանցմամբ՝ Եվգենի Իվանովը զեկույց է պատրաստել 2008 թվականի Վրաստանի ռազմական պլաններից ԱՄՆ-ի իրազեկվածության մասին, որում նշված է.
«2008 թ. ռուս-վրացական օգոստոսյան պատերազմի 3-րդ տարելիցի նախաշեմին Ռուսաստանի նախագահ Դմիտրի Մեդվեդևը ռուս և վրացի լրագրողներին տված հարցազրույցի ժամանակ հայտարարեց, որ մինչև 2008 թվականի հուլիսը հաճախ էր հանդիպում Սաակաշվիլիի հետ։ Ըստ Մեդվեդևի՝ Վրաստանի նախագահը, ամենայն հավանականությամբ, լրջորեն շահագրգռված էր նրանում, որ բանակցությունների ճանապարհով կարգավորի Աբխազիայի ու Հարավային Օսիայի խնդիրները։
Սակայն ամեն ինչ փոխվեց այն բանից հետո, երբ Թբիլիսի այցելեց տվյալ ժամանակ ԱՄՆ պետքարտուղար Քոնդոլիզա Ռայսը։ Նրա հետ հանդիպումից հետո Սաակաշվիլին կտրուկ դադարեցրեց Մոսկվայի հետ իր շփումները։ Ցայժմ նախկինի նման խորհրդավոր է մնում 2008 թվականի հուլիսի 9-ին Քոնդոլիզա Ռայսի վրացական այցի իմաստը։ Պաշտոնապես նա պետք է քննարկեր ՆԱՏՕ-ին Վրաստանի անդամակցության հեռանկարները։
Ռայսին անհրաժեշտ էր Վրաստանի նախագահին հիշեցնել, որ սեփական տարածքի 1/5-ը չվերահսկող երկիրը չի կարող դառնալ ՆԱՏՕ-ի անդամ։ Փաստորեն, Վրաստանի տարածքային ամբողջականության վերականգնումն անհրաժեշտ նախադրյալ էր ՆԱՏՕ-ին անդամակցելու համար։ Միևնույն ժամանակ զգուշավոր ու կոմպետենտ Ռայսը երբեք բաց ձևով Սաակաշվիլիին խորհուրդ չէր տա ուժային ճանապարհով վերադարձնել Աբխազիան ու Հարավային Օսիան։
Սակայն օգոստոսյան պատերազմից առաջ Սաակաշվիլին, Ռայսից բացի, հանդիպել էր նաև մեկ այլ ազդեցիկ ամերիկացու հետ։ Ռայսի հետ հանդիպումից 3 օր առաջ Սաակաշվիլին հանդիպում էր ունեցել ԱՄՆ նախագահ Ջորջ Բուշի վստահելի անձ Կառլ Ռոուվի հետ։ Ավելի վաղ Սաակաշվիլիին բազմիցս զանգահարել է «Հանրապետական» կուսակցությունից նախագահի թեկնածու Ջոն Մաքքեյնը։ Ամենայն հավանականությամբ, հենց նրանք են Սաակաշվիլիին խորհուրդներ տվել գործել Չերչիլի ոգով, ըստ որի՝ պատմությունը գրում են հաղթողները»։