«Առաջին լրատվական»-ի տեղեկություններով՝ ՀՀ երկրորդ նախագահ Ռոբերտ Քոչարյանին սատարող որոշ քաղաքական գործիչներ, որոնց թվում են Հայաստանի նախագահի Ազգային անվտանգության հարցերով նախկին խորհրդական Գառնիկ Իսագուլյանը, Վարդան Օսկանյանն ու «Ազգային համերաշխություն» կուսակցության նախագահ Արամ Հարությունյանը, այս օրերին ինտենսիվ շփումների մեջ են՝ աշնանը Ռոբերտ Քոչարյանին ակտիվ քաղաքականություն վերադարձնելու հնարավոր ուղիներ և զարգացման սցենարներ պատրաստելու նպատակով:
Նշյալ գործիչներից բացի՝ Ռ. Քոչարյանի «վերակենդանացմամբ» շահագրգռված մի քանի քաղաքական և հասարակական ուժեր ևս ակտիվ աշխատանքներ են տանում: Դրանց թվում են ՀՅԴ ռադիկալ թևը և «Ժառանգություն» կուսակցության Ռուբեն Հակոբյան-Լարիսա Ալավերդյան տանդեմը:
Այս բոլորի հանրայնացման համար, որպես մեդիա-պրոյեկտ, ծառայելու է Ռոբերտ Քոչարյանի պաշտոնավարման ժամանակ ՀՀ նախկին արտգործնախարար Վարդան Օսկանյանի ղեկավարած «Սիվիլիթաս» հիմնադրամի մեդիանախագիծը, որը մեկնարկելու է սեպտեմբերի մեկից:
Չի բացառվում, որ նախագծի պատրաստած որոշ ինտերնետային հաղորդումներ հնարավոր լինի հեռարձակել նաև ԲՀԿ նախագահ Գագիկ Ծառուկյանին պատկանող «Կենտրոն» հեռուստաընկերության եթերով:
