Ավստրիայի իշխանություններն Աֆղանստանից ոչ մի փախստականի չեն ընդունի: Այս հայտարարությունն արել է Ավստրիայի կանցլեր Սեբաստիան Կուրցը La Stampa թերթին տված հարցազրույցում, որը հրապարակվել է երեքշաբթի:
«Մենք մեր երկրում չենք ընդունի ոչ մի աֆղան փախստականի,- ասել է նա,- դա տեղի չի ունենա, քանի դեռ ես իշխանության եմ»: Վերջին տարիների ընթացքում Ավստրիա է ժամանել ավելի քան 44 հազար աֆղան, ասել է նա: «Ավստրիայում արդեն բնակվում է աշխարհում չորրորդ ամենամեծ աֆղանական համայնքը»,- նշել է Ավստրիայի կանցլերը:
«Մենք իրատեսական դիրք ենք գրավում. աֆղանների ինտեգրումը շատ դժվար է»,- ասել է Կուրցը: Նա բացատրել է, որ դժվարությունները կապված են մասնավորապես նրանց կրթական մակարդակի հետ, որը «հիմնականում ցածր» է, ինչպես նաև հիմնարար արժեքների հետ կապված տարբերությունների հետ:
Կանցլերն ընդգծել է, որ Ավստրիան հատուկ ուշադրություն է դարձնում Աֆղանստանի հարևան երկրներին աջակցելուն և 20 մլն եվրո է հատկացնում տարածաշրջանում աֆղաններին պաշտպանություն և օգնություն ցուցաբերելու համար:
