ՀՅԴ Հայ դատի Կենտրոնական գրասենյակի կազմակերպմամբ՝ Ստեփանակերտում անցկացվել է ՀՅԴ Հայ դատի Արցախի գրասենյակի բացման պաշտոնական ընդունելություն, որի ընթացքում ներկայացվեցին Ղարաբաղյան հիմնախնդրի ներկա հանգրվանում Հայ դատի համաշխարհային ցանցի քաղաքական առաջնահերթություններն ու Հայ դատի Արցախի գրասենյակի գործունեության հիմնական ուղղությունները։
Պաշտոնական ընդունելությանը մասնակցում էին Արցախի Հանրապետության պաշտոնաթող նախագահներ Արկադի Ղուկասյանն ու Բակո Սահակյանը, արտգործնախարար Դավիթ Բաբայանը, Արցախի խորհրդարանի բոլոր խմբակցությունների և ՀՀ խորհրդարանի «Հայաստան» և «Պատիվ ունեմ» խմբակցությունների ներկայացուցիչներ, պաշտոնատար այլ անձինք։
Գրասենյակի առաքելությունն է լինելու Արցախի հարցով աշխատանքների խթանումը, նյութերի և տեղեկությունների փոխանցումը, Արցախի համապատասխան մարմինների և կառույցների հետ առօրյա հարաբերությունը, Արցախ այցելությունների սատարումը, Հայ Դատի Կենտրոնական գրասենյակի աջակցությամբ խորհրդաժողովների կազմակերպումը, Արցախի բարեկամների միջազգային ցանցի ընդլայնումը և առհասարակ Հայ Դատի աշխատանքների քարոզչությունը Արցախահայության շրջանում։
ՀՅԴ անդամ, Արցախի խորհրդարանի արտաքին հարաբերությունների հանձնաժողովի նախագահ Վահրամ Բալայանից հետաքրքրվեցինք՝ ի՞նչ նպատակով է Արցախում ՀՅԴ Հայ դատի գրասենյակ բացվել, քանի որ ՝ որպես կանոն նման գրասենյակներ կան օտար պետություններում՝ լոբբիստական գործունեություն իրականացնելու համար․«Արցախի Հանրապետության ժողովրդի պայքարը, դատը պաշտպանելու, միջազգային հանրությանը ներկայացնելու ինչպես նաև՝ Արցախի պետականությունը միջազգայնորեն ճանաչելի դարձնելու խնդիր ենք լուծում»։
Շարունակելով Բալայանն ասաց․«Խնդիրն այն է, որ ընդհանուր առմամբ մենք վերջին տարիներին ակտիվ համագործակցել ենք Հայ Դատի տարբեր գրասենյակների հետ։ Օրինակ՝ վերջին հինգ տարիների ընթացքում Արցախ ժամանած 80 պատվիրակությունների կեսը՝ 40-ը, Հայ Դատի գրասենյակների միջոցով է կազմակերպվել»,-«Առաջին լրատվական»-ի հետ զրույցում ասաց պատգամավորը։
Ըստ մեր զրուցակցի՝ կա աշխատանքը ավելի համակարգված դարձնելու խնդիր․«Պետք է գոյություն ունենա մի մարմին, որը ավելի կաշխուժացնի ու աշխատանքը էլ ավելի նպատակային կդարձնի»։
Վահրամ Բալայանը նաև նշեց, որ այն կորուստները, որ մենք ունեցանք 44 օրյա պատերազմի հետևանքով շատ ցավալի էին և հիմա անհրաժեշտ է վերագտնել ինքներս մեզ․«Պետք է մատնանշվեն այդ խնդիրները լուծելու ուղիները։ Առաջ շարժվելու համար նաև հանրային տրամադրությունների մեջ պետք է բեկում առաջացնենք»։
