Հայտնի է, որ աշնանը տեղական ինքնակառավարման մարմինների ընտրություններ են Հայաստանի մի շարք մարզերում, այդ թվում հանրապետության երկրորդ և երրորդ քաղաքում։ Թեև ընտրության օրը դեռևս հստակեցված չէ, սակայն այն համայնքներում, որտեղ ընտրություններ են սպասվում, հատկապես խոշոր քաղաքներում արդեն նախընտրական եռուզեռ է, խմորումներ են, բանակցություններ են թեկնածուների և քաղաքական ուժերի միջև։
«Առաջին լրատվական»-ի տեղեկություններով՝ Վանաձորի քաղաքապետ Մամիրկոն Ասլանյանը,ով արդեն իսկ հայտարարել է, որ միանշանակ մասնակցելու է ընտրություններին, առաջադրվելու է «Ազատ դեմոկրատներ» կուսակցության ցուցակով։
Ինքը՝ Ասլանյանը մեզ հետ զրույցում չհերքեց, որ «Ազատ դեմոկրատների» հետ բանակցությունների մեջ է, բայց ասաց, որ այս պահին որոշակիություն չկա.«Ես դեռևս ոչ մի որոշում չունեմ, քանի դեռ ընտրությունների վերաբերյալ սպառիչ, պաշտոնական տեղեկատվություն չկա, այդ թեման արդիական չէ։ Ես ուղակի հայտարարել եմ, որ մասնակցելու եմ ընտրություններին, բայց թե ինչ ֆորմատով, ինչ ձևաչափով և ոնց, դեռևս հստակ չէ։ Եթե հստակություն լինի, բոլորդ էլ կտեսնեք։ Ես տարբեր ուժերի հետ քննարկումներ ունեցել եմ, հիմա էլ ունեմ՝ այդ թվում ձեր նշած ուժի հետ, բայց որ դեռևս առարկայական որոշում չկա, դա հաստատ է»,-ասաց Ասլանյանը։
Մեր հարցին՝ իշխանական ուժի հե՞տ էլ է քննարկումների, բանակցության մեջ, քաղաքապետը պատասխանեց. «Իշխանության հետ ինչ պիտի քննարկեմ այս պահին։ Քանի դեռ որոշակի ոչ մի բան չկա, ոչինչ չեմ կարող ասել։ Եթե այս պահին որևէ որոշակի բան չկա, ապա չեմ կարող հերքել կամ հաստատել դեռևս չեղած բանը։ Հետևաբար ձեր թվարկած որևէ ուժի հետ բանակցություն այն հարթության վրա չի, որ ես ասեմ՝ այո, կամ ոչ»,-ասաց Ասլանյանը։
Մեր հարցին՝ կա՞ն այլ անուններ, թեկնածուներ, որոնք պատրաստվում են առաջադրվել, Ասլանյանը պատասխանեց. «Տարբեր անուններ են շրջանառվում։ Բայց այս դեպքում էլ որոշակիություն չկա։ Քաղաքական ուժերն էլ հայտարարություն չեն անում։ Ամեն ինչ շրջանառվող խոսակցութունների մակարդակում է»,- եզրափակեց Մամիկոն Ասլանյանը։
