Ադրբեջանում գործող երեք հրեական համայնքների առաջնորդները դիմել են Իսրայելի խորհրդարանի անդամներին՝ կոչ անելով չաջակցել հայոց ցեղասպանության ճանաչման հետ կապված նախաձեռնությանը։ Ստորագրված դիմումի մեջ ասվում է, որ հիշատակված նախաձեռնությունը կարող է բացասաբար անդրադառնալ խաղաղության և կայունության գործընթացի վրա, որն սկսում է ձևավորվել Հարավային Կովկասում։
Դիմումում ընդգծվում է, որ նման զգայուն պատմական հարցերի շուրջ երրորդ պետությունների քաղաքական քայլերը կարող են դժվարացնել խաղաղության գործընթացը և չնպաստել ժողովուրդների միջև հաշտեցման, փոխըմբռնման ու վստահության ամրապնդմանը։ Համայնքների առաջնորդները կարծում են, որ բարդ ու զգայուն պատմական իրադարձությունները պետք է լինեն պատմաբանների և փորձագետների գիտական հետազոտությունների առարկա, այլ ոչ թե քաղաքական որոշումների։ Նրանց կարծիքով՝ այս հարցերի քաղաքականացումը կարող է անհարկի լարվածություն ստեղծել Իսրայելի անկեղծ բարեկամների շրջանում։
