Հայաստանի արտաքին գործերի նախարարի առաջին տեղակալ, նախարարի պաշտոնակատար Արմեն Գրիգորյանը ՀԱՊԿ գլխավոր քարտուղար Ստանիսլավ Զասի հետ հանդիպմանը նրան է ներկայացրել Սյունիքի և Գեղարքունիքի մարզերում հայ-ադրբեջանական սահմանային իրադրությունը, նաև Նախիջևանի ուղղությունից ադրբեջանական պարբերական սադրանքները: Ստանիսլավ Զասը, ինչպես հայտնի է, Հայաստան է այցելել օգոստոսի 9-10-ը: Այդ իմաստով, հատկապես Արմեն Գրիգորյանի հետ հանդիպմանը սահմանային իրադրության առնչությամբ տեղեկություն ստանալու ֆոնին, թերևս հետաքրքիր հարց է առաջանում՝ Ստանիսլավ Զասը կունենա՞ հայ-ադրբեջանական սահմանագոտու այդ հատվածներ այցելելու և, օրինակ Հայաստանում Իրանի, ԱՄՆ դեսպանների օրինակով իրադրությանը տեղում ծանոթանալու քաղաքական համարձակություն:
Ինչպես հայտնի է, օրեր առաջ Գեղարքունիքի մարզի սահմանագոտի էին այցելել նախ Հայաստանում ԱՄն դեսպան Լին Թրեյսին, իսկ հետո էլ Հայաստանում Իրանի իսլամական հանրապետության դեսպանը: Անշուշտ, նրանց սահմանային այցերը բոլորովին չեն կարող միարժեք մեկնաբանվել իբրև հայկական դիրքորոշումների անվերապահ պաշտպանություն: Սակայն այդուհանդերձ դրանք ուշադրության արժանի այցեր են, որոնց ֆոնին էլ թերևս հետաքրքրության է արժանի, թե ինչ կանի Զասը՝ կհամարձակվի՞ այցելել հայ-ադրբեջական սահմանագոտու լարվածության որևէ հատված, Սյունիքում, կամ Գեղարքունիքում, և գոնե այդպիսով թեկուզ խորհրդանշական իմաստով ցույց տա, որ Հայաստանը ներգրավող ռազմա-քաղաքական դաշինքի ներկայացուցիչ է:
Թե Զասն իրականում այդ դաշինքում Բելառուսի նախագահ Լուկաշենկոյի ներկայացուցիչն է, որը մի քանի օր առաջ Մինսկում ընդունել էր Բաքվի դեսպանին և քաղաքական իմաստով գրեթե մինչև գետին խոնարհվել Ալիևի առաջ, նրան ներկայացնելով ռեգիոնալ խաղաղության «աղավնի», ակնկալելով թերևս, որ Ալիևը շռայլ կգտնվի այդ հաճոյախոսությունն ու խոնարհումը գնահատելիս: Եվ, եթե Բաքվում ռազմական կրթություն ստացած Բելառուսի ներկայացուցիչ ՀԱՊԿ գլխավոր քարտուղարը Հայաստանում հանկարծ այցելի հայ-ադրբեջանական սահմանագոտի, ապա Ալիևը կարող է նեղանալ: Իսկ Ալիևի տրամադրության վրա ՀԱՊԿ առաջնորդները դողում են վաղուց, ինչի ամոթալի վկայություն էր դեռևս 2016 թվականի քառօրյան, երբ Ալիևին չնեղացնելու համար նրանք նեղացրին Հայաստանին և չեղարկեցին Երևանում նախատեսված ԵՏՄ վարչապետների հավաքը:
